TOASTMASTERS CLUB PABOU TA LANSA SERI DI PODCAST NOBO I TA INVITA PÚBLIKO PA BISHITÁ NAN STÈNT NA DIA DI BANDABOU
TOASTMASTERS CLUB PABOU TA LANSA SERI DI PODCAST NOBO I TA INVITA PÚBLIKO PA BISHITÁ NAN STÈNT NA DIA DI BANDABOU
BANDABOU / SOTO —Ayera, Area 26 a lansa e promé edishon di un seri di kuater podcast ku tin komo meta pa oumentá visibilidat di Toastmasters na Kòrsou i enfatisá e importansia di desaroyo personal, komunikashon i liderato den nos komunidat. A lansa e promé edishon aki durante reunion di Toastmasters Club Pabou.
E promé edishon aki tabata un momento di gran konmemorashon i un previlegio pa e klup, kaminda a risibí e bishita di un di e funshonarionan mas haltu di Toastmasters International den Karibe: Nathaly Lobato-de Windt, DTM (Distinguished Toastmaster), kende ta e Program Quality Director i e di dos persona den e Trio di Direktornan di Toastmasters International den Karibe. Nathaly ta e di 5 yu di Kòrsou ku a logra okupa un di e posishonnan mas haltu aki na nivel karibense, siguiendo e pasonan di D’arcy Lopez, Erich Rene, Godalys Reina i Fabiola Cleofa (tur DTM).
Un di e metanan prinsipal di un Distrito ta pa sostené klupnan eksistente i krea mas klup pa duna individuonan oportunidat pa desaroyá nan abilidatnan. Tantu Nathaly Lobato-de Windt komo Fabiola Cleofa a hunga un ròl personal i fundamental den fundashon di e promé klup di Bandabou na aña 2021.
Durante su eksistensia, Toastmasters Club Pabou a demostrá ekselensia no solamentu komo organisashon pero tambe na nivel individual. Un ehemplo di esaki ta Dishaira Fenny, kende ta laborá den sektor di kuido, ta miembro desde inisio i a yega di partisipá den kompetensianan di diskurso i ser nombrá komo Toastmaster di Aña na nivel lokal. Aparte di esaki, e klup mes a wòrdu rekonosí na varios okashon komo klup distinguí. Durante e podcast aki, e funshonario di mas haltu na Kòrsou a entregá e premio prestigioso di President’s Distinguished Club na Toastmaster Miosotis Jamanika, kende a logra e rekonosimentu aki pa e klup durante su aña komo presidente di e klup.
Ku e lansamentu aki nèt na porta di e selebrashon di Dia di Bandabou, e promé podcast a konta tambe ku un entrevista spesial ku Nello Pisas, un di e motornan tras di Dia di Bandabou, huntu ku miembro dinámiko Dishaira Fenny. Nello Pisas a enfatisá e importansia di Invertí den desaroyo personal i kon atkerí abilidatnan di komunikashon i liderato efektivo por habri portanan i yuda den bida diario.
Invitashon pa e Públiko i Komunidat di Bandabou
En konekshon ku selebrashon di Dia di Bandabou riba djadumingu 4 di òktober, Toastmasters Club Pabou ta invitá henter e pueblo di Kòrsou, i spesialmente e komunidat di Bandabou, pa bishitá nan stènt number C8 na Soto.
Na e stènt aki, bishitantenan lo por:
- Haña mas informashon i “tep” práktiko riba kiko Toastmasters por ofresé pa bo krese komo orador i lider.
- Inskribí pa e treinen di kapasitashon i desaroyo personal ku lo kuminsá dia 5 di novèmber 2026.
Tur hende ta kordialmente bonbiní pa pasa, kòmbersá i tuma e promé paso pa nan mes desaroyo personal.
