Representantenan di e entidatnan públiko karibense di Boneiru, Sint Eustatius i Saba, i e sinku ‘Waddeneilanden’ Texel, Vlieland, Terschelling, Ameland i Schiermonnikoog, dia 1 i 2 di òktober a bini huntu na Texel pa un programa di trabou di dos dia.

E ocho islanan akí ta uní den e asina yamá Kolaborashon E8. E8 ta e bos konhunto di e komunidatnan insular hulandes pa loke ta trata gobièrnu i polítika. E8 regularmente ta bini huntu tambe pa interkambiá konosementu i traha riba problemanan komun.

E programa di trabou di dos dia

E programa a kuminsá ku yegada di e gobernantenan na e terminal di fèri TESO na Den Helder, kaminda e Komisario di Rei di Noord-Hollanda, Arthur van Dijk, a yama nan bon biní, promé ku nan a biaha pa Texel. Na nan yegada ‘burgemeester’ Mark Pol di Texel a yama nan bon biní.

E promé dia a enserá un presentashon i un bishita na De Zoete Toekomst, un aserkamentu inovativo di almasenamentu di awa dushi pa agrikultura na Texel. E partisipantenan a siña tokante e desafionan i e oportunidatnan relashoná ku maneho sostenibel di awa dushi pa un isla.

E programa a kontinuá ku un seshon temátiko tokante integridat i bon gobernashon insular, bou di guia di e Komisario di Rei Arthur van Dijk. Representantenan di e ‘Waddeneilanden’ i di e islanan karibense a interkambiá eksperensia tokante resiliensia atministrativo, destabilisashon, elekshon transparente i konfiabel, i direktiva di fundashonnan i organisashonnan semi-públiko.

Durante e seshon Jocelyn Levenstone, gezaghèber di Saba, tambe a tene un presentashon tokante e próksimo elekshon di aña 2027 i uso di votamentu ku vòlmagt, siguí pa un interkambio di eksperensia i punto di bista entre e partisipantenan.

John Soliano, gezaghèber di Boneiru, a duna un presentashon tokante bon gobernashon di organisashonnan di gobièrnu i organisashonnan semi-públiko. El a papia tokante e ambiente kompleho den kua e organisashonnan akí ta operá, e ròl di gobièrnu komo akshonista i e diferente ròlnan i responsabilidatnan den e organisashonnan akí. For di e presentashon akí a resultá di ki manera bon gobernashon por duna sosten na e organisashonnan pa logra nan metanan.

Di dos dia

Dia 2 di òktober e programa a kontinuá ku un ekskurshon pa De Slufter, ku a keda organisá den kolaborashon ku ‘Vogelinformatiecentrum Texel’ i ‘Staatsbosbeheer’. Durante e ekskurshon Texel su aserkamentu riba tereno di maneho di naturalesa i protekshon di áreanan vulnerabel di kosta a bini dilanti.

Seguidamente E8 a yama bon biní na miembronan di Tweede Kamer, entre otro miembronan di e komishonnan fiho pa Infrastruktura i Maneho di Awa, i Relashonnan den Reino. Den su diskurso gezaghèber Alida Francis a deskribí tres prioridat importante ku a bini dilanti for di e deliberashonnan ku E8: invershon igual, kapasidat di ehekushon lokal mas fuerte i mas akshon di klima. El a enfatisá ku trato igual no tin mag di nifiká ku ta apliká maneho di tera firme uniformemente na e islanan, pero ku mester logra resultadonan hustu ku ta tene kuenta ku nan grandura, nan realidat logístiko i nan struktura di gastu úniko. Gezaghèber Francis a mustra tambe riba e desafionan ku e gobièrnunan di e islanan chikitu ta konfrontá, entre otro medionan personal limitá i akseso na ekspertisio spesialisá, i el a pone énfasis riba e nesesidat pa fortifiká nan kapasidat pa ehekutá maneho efektivamente. Pa loke ta trata resiliensia kontra klima, el a hasi un yamada pa mas atenshon pa e ehekushon, kaminda el a suprayá ku mester wak mas leu ku solamente strategia: “turn paper into practice – kombertí papel den práktika.”

Pa duna forsa na e prioridatnan konhunto akí, ‘burgemeester’ Mark Pol di Texel i gezaghèber Francis a entregá un bòrchi na e miembro di Tweede Kamer Heera Dijk, riba kua por mira e tres mensahenan núkleo di E8. Dijk a risibí e mensahe konhunto na nòmber di e delegashon, huntu ku su koleganan Marieke Vellinga-Beemsterboer, Luciënne Boelsma-Hoekstra en Björn Schutz, i ku esaki e prioridatnan konhunto di E8 a keda entregá formalmente na Tweede Kamer.

E ‘burgemeester’ di Schiermonnikoog, Henri Meendering, seguidamente a papia tokante e tópiko di siguridat di awa, entre otro e ròl di sistemanan natural manera ‘kwelder’ pa protekshon di kosta. Durante e diskushon nan a para ketu tambe na e relashon entre e funshonnan di ref di koral den área karibense i e medidanan di protekshon di kosta na e ‘Waddeneilanden’.

Nan a klousurá e programa di dos dia ku un bishita na De Schorren, bou di guia di ‘Natuurmonumenten’, i despues e partisipantenan a bandoná Texel pa biaha pa Den Helder.