Tremendo selebrashon di dia di Hende Grandi organisá pa Ministerio SOAW

“Grandinan di ayera, awe i mañan” tabata lema di e selebrashon di dia di Hende Grandi e aña aki organisá pa e ministerio di Desaroyo Sosial, Labor i Bienestar (SOAW)

WILLEMSTAD – 1 di òktober 2026 – Ministerio di Desaroyo Sosial, Labor i Bienestar (SOAW) a selebrá Dia Internashonal di Hende Grandi ku un enkuentro na Renaissance Wind Creek Curaçao Resort. E evento, organisá pa Sektor di Desaroyo Sosial, kende a skohe músika pa reuní grandinan di diferente Kas pa Grandi, pa pasa un mainta di goso, alegria i sosial huntu.

Ministerio di SOAW a skohe músika komo e método sentral pa e selebrashon, pasobra músika ta un idioma universal ku ta konektá generashonnan. Pa hende grandi, músika ta muchu mas ku zonido: ta un fuente di alegria, konsuelo, rekuerdo i amor. Músika ta stimulá tambe memoria, trese trankilidat i yuda hende grandi sinti nan mes mas konektá ku otro.

Minister di Desaroyo Sosial, Labor i Bienestar, Sra. Charetti America-Francisca, a dirigí palabra na presentenan i a enfatisá e balor ku grandinan tin pa nos komunidat:

“Boso ta parti di nos historia, pero tambe parti di nos presente i di e futuro ku nos ta sigui konstruí. Boso a traha, kuida famia, eduká yu i ñetu, traspasá konosementu i duna nos komunidat e base riba kua nos ta pará awe. Pa esei boso meresé nos rèspèt, nos atenshon, pero prinsipalmente: boso meresé di sinti ku boso ta konta.”

Durante e programa ku a keda dirigí pa sra. Cynthia Ricardo, Sr. Reinier Lijfrock a presentá un momento músikal di alabansa, i Sr. Romeo Heije a pone e grandinan rebibá momentnan bunita. E aktividat a konkluí ku aktuashon di e grupo musikal Tipiko Pasa Bon, ku a mantené e ambiente alegre te mèrdia.

Ku e selebrashon aki, ministerio SOAW a transmití un mensahe kla na e grandinan: “Boso ta nos historia, nos inspirashon i nos tesoro. Músika ta indispensabel, pasobra mundu no por sin músika, i nos kurason no por sin boso!”

Finalmente tur Kas di Grandi a risibí un regalo di Sra. Charetti America-Francisca, Minister di SOAW, den forma di un TWS Bluetooth audio system i headphones.

SOAW ta kontinuá ku su kompromiso pa organisá mas aktividat pa nos grandinan.