Duana Hulanda Karibense, Koninklijke Marechaussee (KMar), Wardakosta di Karibe Hulandes, Kuerpo Polisial Hulanda Karibense (KPCN) i Entidat Públiko Boneiru (OLB), lo supervisá i kontrolá kumplimentu ku tur legislashon i regulashon ku ta importante pa kada partner di kadena. 

Tambe, e partnernan di kadena lo sostené otro ku ehekushon di nan tareanan durante e evento. Ademas e diferente partnernan di kadena ta manda refuerso èkstra pa posibel asistensia di emergensia.

Supervishon i e kòntròl ta tuma lugá den e awanan entre Kòrsou i Boneiru, rondó di Boneiru i den e bahia di Kralendijk. 

Duana Hulanda Karibense

Duana lo supervisá riba tráfiko di merkansia ku ta pasa frontera i sòru pa kumplimentu ku e proseduranan korekto di importashon i eksportashon. Tambe nan lo kontrolá riba presensia di merkansia prohibí.

Koninklijke Marechaussee (KMar)

KMar ta responsabel pa vigilansia di frontera na Boneiru. Nan ta kontrolá e kondishonnan di entrada pa personanan i ta kontribuí na kombatimentu di kriminalidat ku ta pasa frontera.

Wardakosta di Karibe Hulandes

Wardakosta di Karibe Hulandes lo ehekutá kòntròl riba balides di dokumento di barku manera karchi di registrashon i pèrmit pa nabegá. E dokumentonan aki mester ta bálido pa e área di Boneiru i Kòrsou. Ademas, Wardakosta di Karibe Hulandes ta kontrolá riba e kantidat di persona na bordo di un boto konforme e karchi di inspekshon i ta mantené órden públiko i seguridat. 

Den kaso di emergensia por tuma kontakto ku Wardakosta di Karibe Hulandes via 913 òf whatsapp 5100913.

Kuerpo Polisial Hulanda Karibense (KPCN)

Durante Regatta, KPCN ta responsabel pa mantenshon di órden públiko i seguridat, tantu riba laman komo riba i rondó di e área di evenemento. E énfasis ta riba supervishon, seguridat di tráfiko i prevenshon di molèster. Den kaso di insidente òf situashon di emergensia, KPCN ta sòru pa e intervenshon polisial nesesario i ta kordiná e asistensia ku e otro servisionan di emergensia i partnernan marítimo.

Entidat Públiko Boneiru (OLB) – Servisio di Haf i Lots

OLB ta kontrolá si ta hasi uso korektamente di bui i lugánan pa mara boto. Tambe lo kontrolá ankramentu i lo retirá bui ku ta mará sin outorisashon. Tambe ta ilegal pa transportá persona sin e pèrmitnan nesesario, esaki ta pa sigurá nan bida riba laman. Ku asistensia di Wardakosta di Karibe Hulandes lo kontrolá riba pèrmit, registro i sertifikado nashonal di seguridat.

MMHB ta pidi atenshon pa subi awa bon prepará i ta konsehá pa aserká e instansianan konserní den kaso di pregunta. Ademas, MMHB ta deseá pueblo di Boneiru i su bishitantenan un Regatta dushi i seif.