Parlamento di Kòrsou a deliberá ku Minister di Salubridat Públiko, Medio Ambiente i Naturalesa.

Djaweps, 8 di òktober 2026, e Reunión Públiko a kuminsá ku tratamentu di e promé punto di agènda, “Dokumentonan ku a drenta”.

Seguidamente, Parlamento a trata e di dos punto di agènda, ku tabata deliberashon ku Minister di Salubridat Públiko, Medio Ambiente i Naturalesa, sr. Tyron Boekhoudt, enkuanto e instalashon di e Konseho di Salubridat.

Presidente di Parlamento, sr. Fergino Brownbill, a habrí e promé tanda, durante kua Miembronan di Parlamento a haña oportunidat pa hiba nan disertashonnan i hasi preguntanan na e representantenan di Gobièrnu.

Despues di e preguntanan, Minister di Salubridat Públiko, Medio Ambiente i Naturalesa, sr. Tyron Boekhoudt, a pidi dos siman di tempu pa por prepará i formulá su kontestanan riba e preguntanan ku Miembronan di Parlamento a hasi durante e promé tanda.

Alabes, Parlamento a aprobá e proposishonnan ku a ser trata anteriormente den Komishon Sentral, entre otro:

Desishon riba miembresia di ParlAmericas (Associate Membership).

Desishon riba proposishon di Komishon Sentral pa stipulashon di e komishon temporal “Tijdelijke Commissie Herdenking 90 jaar Staten”.

Desishon riba proposishon di Komishon Sentral pa stipulashon di e komishon temporal “Komishon Temporal Premio di Rekonosementu”.

Desishon riba proposishon di Komishon Sentral pa stipulashon di e komishon fiho “Vaste Commissie Algemene Zaken”.

A sigui ku e último punto di agènda, ku tabata e eskoho di nòmber pa e emisora di Parlamento.

Despues di un proseso di votashon, Parlamento a aprobá e nòmber Parlamento Kòrsou FM pa e emisora.

Ku e aprobashon di e nòmber Parlamento Kòrsou FM, Parlamento a hasi un siguiente paso den e proseso pa emisora. E proseso lo kontinua den e próksimo periodo, komo meta pa lansa e radio emisora di Parlamento, ofisial.

Na final, Presidente di Parlamento, sr. Fergino Brownbill, a suspendé e reunion te ku próksimo aviso.