E resultado aki ta 22 permiso mas cu e 237 permiso pa negoshi nobo otorga den tercer kwartaal di 2025, representando un crecemento di aproximadamente 9 porciento compara cu e mesun periodo di aña pasa.

E cifra di 259 permiso nobo den juli, augustus y september ta tambe e cantidad mas halto registra den un kwartaal compara cu tur cuatro kwartaal di 2025. Esaki ta confirma cu iniciativa empresarial y interes pa establece actividad comercial na Aruba ta sigui presente den nos economia.

Bista general pa kwartaal y tratamento di peticion  

Pa habri un negoshi of haci cambio den un permiso pa negoshi segun ley, mester haci un peticion bou di Vestigingsverordening Bedrijven. Durante e tercer kwartaal di 2026, Departamento di Asunto Economico, Comercio y Industria (DAECI) a ricibi un total di 579 peticion di diferente tipo. Di esakinan:

• A procesa156,
• 275 tabata ainda den proceso y
• 148 no por a procesa pa falta di documento necesario of comprobante di pago.

Na mes momento, un total di 494 beschikking ministerial relaciona cu permiso di establecimento a firma durante e kwartaal. E cantidad aki ta inclui tanto peticionnan ricibi entre juli y september como peticionnan entrega anteriormente cu a yega na final di nan proceso.

Dato clave y tipo di negoshi 

Di e 259 permiso pa negoshi nobo, a otorga:

• 192 pa VBA;
• 53 pa filiaal;
• 13 pa eenmanszaak;
• 1 pa NV.

Den juli a otorga 106 permiso nobo, den augustus 64 y den september 89.

E actividadnan comercial mas representa entre e negoshinan nobo ta inclui real estate, houdstermaatschappij, construccion y instalacion tecnico manera electricidad y loodgieterswerk, comercio di alimento, paña, accesorio y material di construccion, incluyendo e-commerce, y servicio di beyesa, masahe y kapsalon. E composicion aki ta mustra cu actividad empresarial ta sigui desaroya den diferente segmento di economia Arubano.

Aumento di Kwartaal pa Kwartaal

E resultado di tercer kwartaal ta particularmente significante tambe compara cu e kwartaal anterior. Den segundo kwartaal di 2026 a otorga 104 permiso pa negoshi nobo, mientras cu den tercer kwartaal e cantidad a subi pa 259. Esaki ta representa un aumento di 155 permiso, of aproximadamente 149 porciento, entre un kwartaal y e otro.

Desde october 2022, a introduci un vestigingsbeleid nobo cu a modernisa e proceso pa permiso di negoshi mediante eliminacion di diferente rekisito, digitalisacion di e proceso y un enfoke mas fuerte riba facilitacion di actividad economico. E meta ta pa reduci barrera administrativo y crea un proceso mas accesibel, transparente y eficiente pa empresario.

Maneho economico no ta solamente trata di atrae inversion grandi. Fortalecimento di economia ta depende igualmente di e comerciante, profesional y empresario cu ta tuma e decision pa inicia un negoshi, crea actividad y eventualmente genera oportunidad di trabou.

Durante e prome seis lunanan di 2026, a  otorga 242 permiso pa negoshi nobo. Cu e 259 permiso adicional den tercer kwartaal, e cantidad total pa e prome nuebe lunanan di 2026 ta yega na 501 permiso pa negoshi nobo.

Minister di Finansa, Asunto Economico y Sector Primario Geoffrey Wever ta gradici e team di Departamento di Asunto Economico, Comercio y Industria (DAECI) pa nan trabou continuo den ehecucion di Vestigingsverordening Bedrijven y pa procesa e peticionnan na un forma profesional y confiabel. Gobierno lo sigui traha pa mehora e proceso, kita obstaculonan innecesario y mantene un clima economico cu ta stimula comercio, inversion y iniciativa empresarial.