Polis a para un vehíkulo ku dos okupante riba Kaya Soeur Bartola pa kòntròl.

Den oranan trempan di mardugá di awe djabièrnè 23 di òktober, polis a para un vehíkulo ku dos okupante riba Kaya Soeur Bartola pa kòntròl. Durante kòntròl, polis a sinti holó di supstansia probablemente narkótiko, i a sigui ku kòntròl mas aleu. Durante kòntròl, pasahero di e vehíkulo a mira e posiblidat i a hui for di e sitio. Pa e motibu aki polis a inisiá un persekushon na pia su tras. E sospechoso a saka un arma di kandela i a dirigí esaki riba polis. Polis a lòs tiru i a logra detené e sospechoso na Kaya Gavilan. Ta trata di un hòmber di inisial B.R.P. di 31 aña di edat.

Tambe a detené shofùr di e vehíkulo, un dama di inisial A.R.A. di 28 aña di edat. Ambos detenshon ta pa violashon di Lei di Arma di Kandela BES.

En konekshon ku e kaso aki, a tene entrada hudisial na un kompleho di apartamentu na Kaya Aguilá. Polis a konfiská diferente artíkulo ku ta relevante pa e investigashon.