Enkuentro informal entre parlamentarionan di Kòrsou i Hulanda

Djárason, 21 di òktober 2026, miembronan di Komishon pa Asuntunan di Reino, Relashonnan Interparlamentario i Relashonnan Eksterior di Parlamento di Kòrsou, tabatin un enkuentro informal ku miembronan di Komishon pa Asuntunan di Reino di Tweede Kamer di Hulanda.

E delegashon hulandes ta bishitando e islanan ABC di 19 te ku 23 di òktober, den kuadro di un bishita di trabou i konosementu den e komposishon nobo di e komishon despues di e elekshonnan na Hulanda. Despues di nan bishita na Aruba, e delegashon a yega Kòrsou i lo sigui despues pa Boneiru.

Durante nan estadia na Kòrsou, nan a hasi uso di e oportunidat pa enkontrá ku e parlamentarionan di Parlamento di Kòrsou. E enkuentro a brinda e dos komishonnan espasio pa dialogo i interkambio di perspektivanan tokante e relashon den Reino i otro tópikonan di interes komun.

E próksimo enkuentro ofisial entre parlamentarionan di e paisnan di Reino ta tuma lugá durante e reunion di Interparlementair Koninkrijksoverleg (IPKO), ku ta programa pa yanüari 2027 na Sint Maarten.