For di Hulanda lo ta presente Sra. Mineke de Vries, autor di e biografia di Frank Martinus Arion di Corsou. Titulo di e biografia ta “Uit baldadig hout ben ik gesneden”. Den e buki, Sra. De Vries ta describi no solamente e bida di Frank Martinus Arion, pero tambe e prijs cu el a paga pa adelanto social, ambicion intelectual y independencia cultural.

E escritor Frank Martinus Arion (1936-2015) tabata un escritor reconoci, pero su infancia y hubentud tabata uno bastante dificil. Frank a keda su bida largo cu resentimento y cu sentido di culpabilidad y di berguensa. ‘Mi ta spera cu e historia di su bida lo demostra kico huicio y opresion por haci cu un hende”, Mineke de Vries ta comenta.
Tambe lo tin presentacion di e documental: ‘Frank Martinus Arion: De man, de vrouw, de poëzie’ di cineasta Cindy Kerseborn (d.f.m.).

Biblioteca Nacional Aruba, Departamento di Cultura Aruba y Gestor Cultural drs. Mirto Laclé ta trece presentacion di un obra literario significativo pa historia y literatura di Caribe pa comparti cu comunidad di Aruba.