Konferensia Inter-Parlamentario di Reino ta lugá e siman aki Na Sint Maarten

 

Konferensia Inter-Parlamentario di Reino ta lugá e siman aki Na Sint Maarten

 

Djárason dia 4 di mei te ku djabièrnè dia 6 di mei 2022 Sonesta Maho Beach na Philipsburg lo ta e esenario kaminda representantenan di Parlamento di Kòrsou, Aruba, Sint Maarten, Senado i Kamara di Representantenan (Eerste en Tweede Kamer der Staten Generaal) di Ulanda ta bini huntu pa trata puntonan di agènda pa asina yega na un konsenso riba temanan aktual di interes di tur e paisnan den Reino Ulandes. E konferensia Inter-Parlamentario aki ta konosí komo IPKO.

 

Un dia promé ku e IPKO kuminsá, e delegashonnan di Aruba, Kòrsou i Sint Maarten lo reuní den un asina yamá Tripartit.

Pa e Tripartit di djamars dia 3 di mei 2022 lo tin deliberashon riba entre otro e COHO i un proposishon nobo pa un Areglo di Disputa. Tambe lo skucha un delegashon di Sint Eustatius ku lo duna un presentashon di e situashon aktual na e isla i perspektivanan pa futuro einan.

E reunion Tripartit tin komo ophetivo pa e paisnan den Karibe yega na un vishon i pensamentu komun pa asina forma union den nan manera di deliberashon i negoshashon ku e delegadonan di Ulanda.

 

Durante e seshon formal di IPKO tur pais lo duna un presentashon di e desaroyonan mas resien ku nan paisnan a bin ta konfrontá kuné, despues nan lo haña un splikashon tékniko riba e lei di konsenso COHO. Despues lo sigui ku deliberashonnan riba varios tema rondó di varios aspekto ku e COHO ta trese kune i ròl di Parlamentonan den prosesonan di leinan di Reino en general.

Tambe lo pone atenshon riba e relashonnan entre e partnernan den Reino; esta kon esakinan ta, kon lo mester drecha esakinan i ki rekomendashonnan lo por tin pa un relashon mas duradero.

Parti di e IPKO lo ta tambe algun bishita di trabou. Den e kuadro ei, e Parlamentarionan lo haña varios presentashon di outoridatnan di Sint Maarten. Entre otro lo trata e sistema di enkarselashon i lo hasi un rekorido den e hospital.