Minister di Comunicacion, mr. Geoffrey Wever: Feliz Dia Mundial di Libertad di Prensa
Minister di Comunicacion, mr. Geoffrey Wever:
Feliz Dia Mundial di Libertad di Prensa
ORANJESTAD – Awe riba Dia Mundial di Libertad di Prensa, Minister Geoffrey Wever ta felicita y duna homenahe na tur miembronan di prensa pa nan dedicacion y nan esfuersonan continuo den nan rol importante pa fortifica Aruba su democracia.
Un dia cu a wordo declara na aña 1993 door di e Asamblea General di Nacionnan Uni, unda ta afirma cu libertad di prensa ta un parti integral y basa riba e derecho fundamental di libertad di expresion, na servicio di humanidad. Pesey ta importante pa prensa na nan turno tin e libertad pa ta independiente di Gobierno, libertad pa ta critico y expresa nan mes uzando e media desea. Asina prensa na Aruba por ta coherente cu normanan internacional relatando na libertad di expresion, etica profesional, acceso na informacion y siguridad di periodistanan.
Minister Wever ta consciente di e preocupacionan cu tin den comunidad encuanto libertad di prensa di expresa y informa, y ta sigura cu gobierno ta garantisa un futuro unda prensa por sigui ehecuta nan profesion na un manera independiente, sin influencia di gobierno, na beneficio di pueblo di Aruba. E rol di prensa imparcial, critico y independiente ta di suma importancia y ta un di e pilarnan di nos estado di derecho, cu nos lo proteha y garantisa. Un gran pabien y danki na tur esnan cu traha na fabor di prensa Arubano.
