E maneho aki ta destina exclusivamente pa muchanan menor di edad cu ya tin un tempo caba na Aruba prome cu e fecha menciona. Esaki NO ta un oportunidad pa trece yiunan menor di edad for di exterior pa despues legalisa nan estadia. E maneho temporal ta termina 31 di december 2026 y ta mara na condicionnan y rekisitonan estableci pa DIMAS.

E maneho aki no ta representa un legalisacion automatico, ya cu lo evalua cada solicitud individualmente conforme e condicionnan y rekisitonan aplicabel. Esaki ta inclui entre otro acta di nacemento apostilla, potret, paspoort valido, entrada anual di mayor (garante) etc.

Minister Dowers a enfatisa cu e iniciativa aki ta dirigi riba un grupo vulnerabel cu, durante e trayectonan anterior di Hunto pa Progreso, no tabatin e posibilidad pa regularisa nan situacion di estadia mirando cu Hunto pa Progreso tabata dirigi riba migrantenan cu ya tabata na Aruba di forma indocumenta pa yena e demanda laboral den diferente sector. E maneho temporal aki ta brinda e oportunidad pa regla e status di e muchanan menor di edad, cu a drenta Aruba prome cu 21 di october 2026 y cu ainda ta indocumenta, y ta termina 31 di december 2026.

“Ta importante cu, den e marco di un maneho di admision responsabel y structura, tin atencion pa situacion di muchanan menor di edad, teniendo cuenta cu nan bienestar y e responsabilidad di mayornan pa garantisa cu nan yiunan ta cumpli cu e leynan di Aruba,” segun Minister Dowers.
Na mes momento, e ta enfatisa cu e oportunidad aki ta limita na e grupo specifico menciona y no ta implica un ampliacion general di e programa Hunto pa Progreso.

DIMAS lo ta encarga cu evaluacion di e solicitudnan y aplicacion di e condicionnan determina.

Procedura di aplicacion y informacion:

Ta urgi mayornan interesa pa revisa e terminonan y condicionnan cuidadosamente y pa entrega nan peticion prome cu e fecha limite di 31 di december 2026.

• Website: www.dimasaruba.aw
• WhatsApp: +297 569 8173
• Personalmente: Receptie van de DIMAS