ESF7 di SOAW ta informá pueblo tokante evakuashon i refugio durante ‘Ami Ta Prepará Expo’

Ministerio ta enfoká riba responsabilidat propio: “Un famia bon prepará ta duna e trahadónan di emergensia e espasio pa yuda kaminda tin mas nesesidat”

WILLEMSTAD – Djasabra pasá, 17 di òktober 2026, Ministerio di Desaroyo Sosial, Labor i Bienestar (SOAW), den su ròl komo Emergency Support Function 7 (ESF7), a partisipá den e di kuater edishon di ‘Ami Ta Prepará Expo’ na Plenchi di Brion, Otrobanda. Entre 4’or di atardi i 9’or di anochi, e tim di ESF7 a informá bishitantenan tokante evakuashon, kon pa prepará un pakete di emergensia i kon e refugionan (shelters) di gobièrnu ta funshoná.

E tema di e feria tabata ‘Mi ta prepará’. E evento tabata un inisiativa di Direkshon di Maneho di Riesgo i Desaster (DRR), den kolaborashon ku e servisionan di gobièrnu i e organisashonnan ku ta forma parti di Organisashon di Maneho di Krísis i Desaster (CRBO).

Algu nobo e aña aki tabata e ‘Ami Ta Prepará Scavenger Hunt’, un búskeda ku outo pa tim di máksimo sinku persona, ku un premio prinsipal di te NAf 2.500.

ESF7 den e maneho di desaster

Kòrsou tin un Organisashon di Maneho di Krísis i Desaster (CRBO), for di dies Emergency Support Function. Kada ESF ta responsabel pa su mes área di trabou durante un krísis òf desaster. Den kaso di krísis, e ESFnan involukrá ta reuní den CRBO.

Ministerio di SOAW ta enkargá ku ESF7: e refugio sosial i sosten sosial. Esaki ta inkluí e maneho di e refugionan di gobièrnu den kaso di evakuashon. Ta Minister President ta indiká ku tin un situashon ku ta rekerí pa habri e refugionan.

“Un refugio no ta un hotèl ni un lugá luhoso,” segun señora Albertus. “Ta un lugá sigur pa tur hende ku durante un desaster no tin ningun otro kaminda pa bai. Pa e motibu ei nos ta pidi hende pa promé wak si nan por keda serka famia òf konosí. Asina nos ta tene e refugionan liber pa esnan ku mas mester di nan.”

Mensahenan prinsipal di ESF7

Durante e feria, ESF7 a pone énfasis riba kuater mensahe práktiko.

1. Ora di evakuá, hiba lo siguiente ku bo:

• pasport, sédula, reibeweis i otro dokumento di balor;

• papelnan importante, manera dokumentonan di seguro, di kas i di outo, i diploma;

• selular ku un kargadó ku no mester koriente, manera un bateria portátil (powerbank);

• un lista di e miembronan di famia ku nan datonan importante.

2. Prepará un pakete di emergensia ku:

• remedi;

• lampi (flashlight);

• bòter di awa;

• kuminda kla pa kome òf kuminda den bleki, buskuchi i kosnan similar;

• un radio chikitu ku bateria;

• artíkulonan di higiena personal;

• plaka kèsh;

• papel di baño.

3. Kiko un refugio ta ofresé?
Un matras, guia sosial, promé yudansa i un espasio sigur pa keda durante e desaster.

4. Unda e refugionan di gobièrnu ta?
Gobièrnu ta anunsiá ki ora evakuashon ta nesesario. E ora ei e refugionan ta habri pa pueblo.

“Ami Ta Prepará ta nifiká ku kada un di nos mes ta tuma un paso,” segun señora Aniceta, Sekretario General a.i. “Mas famia tin nan pakete di emergensia i dokumentonan na òrdu, mas espasio e servisionan di emergensia ta haña pa e hendenan ku no por yuda nan mes. Nos ta gradisí tur hende ku a pasa djasabra, i nos koleganan di CRBO pa e bon kolaborashon.”

Temporada di orkan ta bini tur aña te ku 30 di novèmber. Ministerio di SOAW ta hasi un yamada na pueblo pa prepará un pakete di emergensia for di awor kaba i pa sa unda e refugio mas serka ta. Den kaso di menasa di desaster, sigui solamente i eksklusivamente e informashon ofisial di gobièrnu. Pa mas informashon, bishitá ‘Ami Ta Prepará’ riba Facebook i Instagram, i e kanalnan ofisial di Gobièrnu di Kòrsou.

MAS NOTISIA

Ministerio konserní:Desaroyo Sosial, Labor i Bienestar