Minister di ministerio di Maneho di Gobernashon, Planifikashon Servisio Públiko ke aklará tokante datonan di senso.
Minister di ministerio di Maneho di Gobernashon, Planifikashon Servisio Públiko ke aklará tokante datonan di senso.
Willemstad – Den e siman aki Minister di Maneho di Gobernashon, Planifikashon i Servisio Publiko a tuma nota den medionan di komunikashon ku aparentemente lo mester a bende ‘database’ di Senso 2011 ku tersera. Komo e Minister responsabel i enkargá ku Centraal Bureau voor de Statistiek (CBS), Minister mr. Norberto Ribeiro ta ninga kategorikamente e insinuashonnan aki. Minister Ribeiro ta lamentá ku algu asina ki por ta sirkulando den prensa.
Centraal Bureau voor de Statistiek (CBS) i su funshonarionan ta para pa integridat di datonan ku ta keda produsí na un manera konfiabel konforme reglanan internashonal. E motibunan ku ta mustra ku CBS ta funshoná na un manera serio i profeshonal ta lo siguiente:
1. E instansha aki ta protehá na un manera debido tur informashon (konfidensial) ku e ta risibí.
2. CBS su informashon (statistik) nunka no a i lo no ta kondusí na un persona (individuo) of un kompania individual.
3. Tur dato di CBS ta wòrdu anonimisá promé ku hasi nan disponibel pa públiko.
4. E datonan di Senso ta disponibel pa públiko.
5. CBS no ta bende informashon (statistik), por haña esaki gratis, paso tur dato di CBS ta aksesibel pa públiko i tambe por download informashon (statisik) pòrnada for di website di CBS: http://www.cbs.cw.
Segun Minister Ribeiro probablemente lo ta trata di un persepshon robes kaminda ku enbes di e “database di senso 2011” lo ta e “registro di votado” (kiesregister) ku ta wòrdu referí na dje. Konforme artíkulo 7 di nos Reglamento di Elekshon (Kiesreglement) e “registro di votadó” ta menshona nòmber kompleto, lugá i fecha di nasementu, number di identifikashon i adrès di un votado, i tambe e urna kaminda é ta pertenesé.
Konforme artíkulo 9 e minister ta obligá, sin gastu algun, pa duna informashon na esnan interesá pa mira si nan ta registrá korektamente den e “registro di votado”. Den ensiso 3 di artíkulo 9 ta bisa ku partidonan polítiko por haña 2 kopia gratis di e “registro di votado kompleto”. Pues e “registro di votado” ku tur e datonan meshoná den dje ta optenibel sin ku mester paga nada pa nan.
Minister Ribero ta lamentá ku informashonnan asina aki ta sali den medio di komunikashon ku por tacha integridat di departamentunan i su funshonarionan ku ta hasi nan máksimo esfuerso pa traha profeshonalmente na bienestar di nos komunidat.