Parlamentario Ishahier Monte ta proponé Oumento di supsidio den e sektor di kuido pa subi salario

Segun parlamentario pa frakshon di MFK, sr. Ishahier Monte, tin hopi fundashon, asosiashon i organisashonnan sosial na Kòrsou ku ta hunga un papel fundamental den e sektor di kuido na Kòrsou. E organisashonnan aki ta kontribuí diariamente na salubridat, bienestar, dignidat humano den nos komunidat i ta yuda aliviá e preshon ku tin riba e sistema di salubridat públiko .

Sin embargo, segun sr. Monte, hopi di e organisashonnan aki ta enfrentá preshon finansiero kresiente debí na inflashon, oumento di gastunan operashonal i oumento persistente di kosto di bida. Na mes momentu, hopi di e trahadónan den e sektor supsidiá den kuido ta sinti e preshon riba nan forsa di kompra i bienestar finansiero.

Sr. Monte ta bisa ku a yega e momento pa evaluá si e modelo aktual di supsidio ta den línea ku e realidat ekonómiko di awe. P’esei, sr. Monte, hasiendo uso di artíkulo 96 di Reglamentu di Òrdu di Parlamento, ta formulá un serie di pregunta na Minister di Salubridat Públiko, Medio Ambiente i Naturalesa pa haña klaridat tokante e maneho aktual di supsidionan den e sektor di kuido i e posibilidat di revisá e sistema.

Entre otro, sr. Monte kier sa si gobièrnu tin espasio presupuestario pa konsiderá un oumento selektivo di supsidio pa fundashon, asosiashon i otro organisashonnan supsidiá den e sektor di kuido, ku e kondishon ku e rekursonan adishonal ta wòrdu destiná direktamente na mehorashon di salario, kompensashon i kondishonnan laboral di trahadónan den e sektor di kuido.

Segun sr. Monte, e meta no ta solamente pa yuda e organisashonnan, sino tambe pa mehorá bienestar di e personanan ku diariamente ta dediká nan mes na sirbi pueblo di Kòrsou den e institutonan supsidiá den e sektor di kuido.

“Un sektor supsidiá di kuido fuerte ta esensial pa nos pais. Ora nos invertí den e organisashonnan aki, nos ta invertí no solamente den institushonnan, sino tambe den salubridat, bienestar i dignidat humano, spesialmente di e gruponan mas vulnerabel den nos sosiedat”, asina parlamentario Ishahier Monte ta deklará.

Sr. Monte ta kere ku mehorashon di remunerashon i kondishonnan laboral por kontribuí positivamente na motivashon, retenshon di personal, stabilidat organisashonal i kalidat di servisio den e sektor di kuido.

Mester tuma e asuntu aki ku e seriedat ku e meresé. Mester habri un diálogo konstruktivo ku e sektor supsidiá di kuido, ku e meta pa yega na solushonnan struktural ku ta benefisiá tantu trahadónan komo nos komunidat en general, asina sr. Monte ta finalisá.

Ishahier Monte

Parlamentario pa

Frakshon di MFK