Kooyman kontentu di por selebrá huntu ku Fundashon Johan Cruyff

Kooyman kontentu di por selebrá huntu ku Fundashon Johan Cruyff

WILLEMSTAD: Ku masha orguyo Kooyman a partner ku Fundashon Johan Cruyff den selebrashon di e promé aniversario di su Cruyff Court na Montaña. E evento festivo i deportivo por a konta ku mas o ménos 100 mucha di vários bario i organisashon na Kòrsou pa un atardi yena ku deporte, wega, entretenimentu, i kompromiso ku komunidat. Diseñá pa introdusí partisipantenan nobo na e programa di Cruyff Court, e evento a sirbi tambe komo un antisipashon emoshonante pa e Kopa Mundial di FIFA i e entusiasmo rondó di Kòrsou su Blue Wave.

Durante henter atardi, muchanan a partisipá den weganan di futbòl, workshops, i aktividatnan rekreativo adaptá na diferente grupo di edat. A organisá kompetensianan spesial di futbòl pa muchanan di 12 pa 14 aña, miéntras ku e salanan paden tabata pa un variedat di wega i aktividat. Pa kompletá e selebrashon, tur mucha a risibí limonada, hòdòk, pòpkòrn i djus, miéntras ku un DJ a tene e ambiente energétiko i festivo. E evento no solamente a selebrá un aña di impakto pero tambe a destaká e poder di deporte den trese komunidat huntu i enkurashá desaroyo deportivo serka nos hóbennan. 

Esaki ta marka Kooyman su promé aña komo patrosinador di Fundashon Johan Cruyff. Komo parti di su esfuersonan pa ku responsabilidat sosial korporativo, Kooyman ta sostené aktivamente fundashonnan i inisiativanan ku ta aliña ku su tres pilarnan sentral: Hubentut/ Edukashon, Redukshon di Pobresa, i Sostenibilidat. Ora ku Fundashon Johan Cruyff a aserka, Kooyman a rekonosé un aliniashon fuerte ku su pilar di Hubentut i Edukashon i tabata kontentu di por a sostené e inisiativa. Pa medio di partnerships manera esaki, Kooyman ta keda komprometé na invertí den oportunidatnan ku ta empoderá hóbennan, fortalesé komunidat, i krea un impakto positivo pa henter Kòrsou.

—