Kiebro den negoshi ku detenshon i konfiskashon 

KUERPO POLISIAL KÒRSOU 

KOMUNIKADO DI PRENSA

373/2026

27 òktober 2026 

Kiebro den negoshi ku detenshon i konfiskashon 

Djamars 27 di òktober 2026 alrededor di 04.23’or, Sentral di Polis a risibí  informashon di un kaso di kiebro ku ta tumando lugá na un optika riba  Fokkerweg. 

Personal di un kompania di seguridat a konstatá e kiebro aki i a mèldu  polis ku a yega mesora. 

E unidat polisial a topa ku e sospechosonan na pia den área di e negoshi. Na momentu ku nan a tuma nota di presensia di polis, nan a hui na pia.  Despues di un persiguishon tras di e malechornan, a bin detené nan. Unu den Bankwerkersweg i e otro na momentu ku el a kore drenta un kas  pa skonde den Kleermakersweg. 

Ta trata di e hòmbernan L.A.B. di 33 aña di edat i T.A.R. di 36 aña di  edat, ámbos nasé na Kòrsou. 

Kontinuando ku e investigashon na altura di Lindberghweg a haña i  konfiská varios artíkulo ku ta prosedente di e ladronisia enkestion.  

A presentá e sospechosonan dilanti di un fiskal ouksiliar ku a ordená nan  enkarselamentu pendiente di mas investigashon.