48 partisipante ta start Kurso di Transporte Públiko

WILLEMSTAD – Un total di 48 partisipante a kuminsá kursonan di ‘Rijdend met Kompas sertifikado A i B’ pa sea shofùr di taksi òf bùs. E kurso ta organisá pa Ministerio di Tráfiko, Transporte i Planifikashon Urbano (VVRP) den estrecho kolaborashon ku Ofisina di Turismo di Kòrsou (CTB).

E kurso di transporte públiko ‘Rijdend met Kompas sertifikado A i B’ su meta ta pa duna oportunidat pa bira un shòfùr profeshonal di transporte públiko, sea pa kore taksi òf bùs. E kurso ta konsistí di diferente tema ku ta di importansia pa e shòfùr profeshonal, entre otro;

– lei di transporte,

– 3 diferente idioma tantu verbal komo por eskrito,

– servisio di kalidat,

– turismo resiliente,

– bo salú, i

– hopi mas.

E kurso ta tuma lugá na Universidat di Kòrsou (UoC) i ta keda kordiná pa Nostra Growth ku ta e instansia sertifiká pa Ministerio di Enseñansa pa duna e kurso di transporte públiko.

Tambe ta premiá kursistanan ku destaká tantu durante lèsnan i por medio di nan puntuashon.

Por tuma nota ku tin diferente partisipante yòn ku ta interesá pa bira shofùr profeshonal. Esaki sigur ta algu di aploudí mirando ku e ta duna indikashon ku nan tambe ta mira potensial den un trabou den área di transporte públiko i tambe turismo.

VVRP, CTB, OWCS, i Nostra Growth ta deseá tur partisipante ku a kuminsá e kurso ku éksito.