Minister Charetti America-Francisca ta lansá KEDA KONEKTÁ: “E lus ku ta keda. E awa ku ta keda.”
Minister Charetti America-Francisca ta lansá KEDA KONEKTÁ: “E lus ku ta keda. E awa ku ta keda.”
Inisiativa di SOAW den kolaborashon ku Aqualectra ta enfoká riba solushonnan duradero pa famianan ku ta enfrentá difikultat ku awa i koriente.
WILLEMSTAD, 26 di òktober 2026 – Ministerio di Desaroyo Sosial, Labor i Bienestar (SOAW), bou di liderato di Minister Charetti America-Francisca, a lansá KEDA KONEKTÁ, un inisiativa desaroyá den kolaborashon ku Aqualectra pa yuda famianan ku, pa motibunan finansiero, ta enfrentá difikultat pa mantené nan akseso na awa i koriente.
KEDA KONEKTÁ ta representá un siguiente paso den e esfuersonan pa atendé ku e problemátika di famianan ku, pa motibunan finansiero, a keda sin awa òf koriente, òf ku ta enfrentá debe haltu relashoná ku e servisionan esensial akí.
E inisiativa ta konstruí riba e fundeshi di e promé dos fasenan di Pasku di Bida, ku a brinda alivio na famianan den momentonan difísil. Awor, e enfoke ta bai mas ayá di rekonekshon temporal, KEDA KONEKTÁ ta pone mas énfasis riba guia, edukashon, uso responsabel di e servisionan i prevenshon di deskonekshonnan repetitivo.
Di alivio temporal pa solushonnan duradero
Durante su diskurso, Minister America-Francisca a enfatisá ku akseso na awa i koriente ta fundamental pa bienestar, salubridat, edukashon i dignidat di kada famia.
“Tin kos ku nos ta hasi tur dia, kasi sin pensa. Nos ta primi un schakelaar i lus ta sende. Nos ta habri un kranchi i awa ta sali. Pero ora e lus no sende i e awa no sali for di kranchi, e bida den un kas ta kambia.”
Segun e Minister, e reto no ta solamente pa restablesé e suministro di awa i koriente, sino tambe pa yuda famianan logra mas stabilidat i prevení ku nan bolbe enfrentá e mesun situashon.
E nòmber KEDA KONEKTÁ ta reflehá e ambishon akí: keda ta representá kontinuidat, stabilidat i siguridat, miéntras ku konektá ta representá no solamente akseso na awa i koriente, sino tambe na guia, sosten i oportunidatnan pa progresá.
SOAW i Aqualectra ta uni forsa
Den e kolaborashon aki, SOAW ta kontribuí ku su eksperensia den guia i sosten di famianan, miéntras ku Aqualectra ta aportá su konosementu tékniko i operashonal relashoná ku suministro di awa i koriente, edukashon i uso responsabel di e servisionan.
E programa ta pone énfasis riba un kombinashon di sosten sosial, responsabilidat individual, evaluashon i siguimentu periodikamente.
“Bario ta famia”
Un di e elementonan importante di KEDA KONEKTÁ ta e enfoke riba nos barionan. Sentronan di bario lo fungi komo puntonan di akseso pa informashon i orientashon, miéntras ku lidernan di bario por yuda alkansá famianan ku tin mester di sosten.
E enfoke akí ta reflehá e filosofia di Minister America-Francisca: “Mi ta skucha bo” i “Bario ta famia”, kaminda e nesesidatnan di famianan ta forma e punto di salida pa akshon sosial.
Un yamada na responsabilidat kompartí
Durante e lansamentu, e Minister a invitá lidernan di bario, sentronan di bario, parlamentarionan, organisashonnan sosial, medionan di komunikashon i komunidat en general pa yuda suminstrá e informashon tokante KEDA KONEKTÁ.
E Minister a hasi un yamada personal na tur hende pa pensa riba un famia, un bisiña òf un konosí ku por ta enfrentá difikultat ku awa òf koriente, i pa yuda e persona ei haña informashon korekto.
“Yuda nos alkansá por lo ménos un famia.”
Ku e yamada akí, SOAW ke stimulá kolaborashon den komunidat pa mas famia por haña informashon i akseso na e proseso di evaluashon.
Registrashon pa KEDA KONEKTÁ
Famianan ku ta enfrentá difikultat ku awa i koriente por registrá via e formulario online:
Kada petishon lo wòrdu evaluá segun e kriterianan i kondishonnan aplikabel. Registrashon no ta garantisá aprobashon ni rekonekshon outomátiko.
Un kontribushon na desaroyo sostenibel
KEDA KONEKTÁ ta alineá ku e Metanan di Desaroyo Sostenibel di Nashonnan Uní, partikularmente SDG 1, SDG 6 i SDG 7, ku ta trata di pobresa, akseso na awa i akseso na energia.
Minister America-Francisca a sera su mensahe ku un kompromiso pa sigui skucha, traha i mehorá, ku e meta pa mas famia por avansá ku dignidat.
“E lus ku ta keda. E awa ku ta keda. Un futuro kaminda nos no ta laga niun hende atras.”
KEDA KONEKTÁ – Un futuro kaminda nos no ta laga niun hende atras.
