Global Entrepreneurship Week ta anunsiá ku durante di Novèmber kompletu lo selebrá entrepreneurship Ku mas di 30 evento ku lo realisá huntu ku partnernan 

Global Entrepreneurship Week ta anunsiá ku durante di Novèmber kompletu lo selebrá entrepreneurship

Ku mas di 30 evento ku lo realisá huntu ku partnernan 

WILLEMSTAD – Djaweps atardi e ‘board’ di Global Entrepreneurship Week (GEW) Curaçao a tene un enkuentro ku prensa, representantenan di organisashonnan spònsòr, partnernan i invitadonan spesial na Quatre Vins restaurant kaminda a informá di un kantidat grandi di aktividat den kua lo tira lus riba entrepreneurship, i tambe lo sembra i kultivá simianan emprendedó.

Global Entrepreneurship Week ta un inisiativa di GEN Global, ku sede na Washington, D.C., pa durante di un siman den luna di Novèmber stimulá i selebrá entrepreneurship na e kasi 200 pais miembro di Global Entrepreneurship Network (GEN). Na Kòrsou, Fundashon Negoshi Pikiña na 2014 a risibí lisensia pa organisá GEW pa Dutch Caribbean. Loke ku e tempu ei a kuminsá komo un ‘week’, entre tantu a krese bira un luna kompletu di aktividat ku board di GEW Curaçao ta realisá huntu ku spònsòrs i partnernan.

Aktividatnan ku ta ekspandé for di den skolnan di fundeshi, skolnan avansá, den barionnan, e organisashon representante di dunadónan di trabou, sektor komersial, gubernamental i semi-gubernamental. Aktividatnan ku ta varia for di seshonnan informativo i inspirativo ehekutá pa GEW Curaçao su invitado internashonal, Stephan Reckie, di eorganisashon mama, GEN., I un kantidat masha grandi di ekspertonan lokal ku konosementu amplio riba vários tereno di interes, no solamente pa e empresario, pero komunidat en general. 

Durante di e enkuentro, despues ku presidente di GEW Curaçao a hiba un diskurso, representantenan di vários  organisashon spònsòr, i organisashon partner ku ta organisá un òf mas evento bou di e paraplü di GEW Curaçao, a informá esnan presente di nan evento/aktividat(nan). Tambe, Manager di Komunikashon di GEW Curaçao, Farley Lourens, a anunsiá ku e website nobo, www.gewcuracao.com ta ‘live’. “Riba e website por mira informashon di kada evento spesífiko i por registrá pa partisipá na e eventonan di bo eskoho. Tambe nos ta rekomendá pa tur dia chèk e páginanan di FB i IG di GEW Curaçao i alabes sigui medionan di komunikashon konvensional pa keda al tanto di tur loke lo tuma lugá den kuadro di GEW Curaçao 2026.”