Minister Hato ta felisitá 12 persona ku a huramentá den sektor di hustisia i ta yama bon biní na 4 empleado nobo di Imigrashon

WILLEMSTAD, 2 di novèmber 2026 – Awe mainta, Minister di Hustisia, mr. Shalten Hato, a tene seremonia di huramentashon di 9 personal di imigrashon ku lo kuminsá nan período di stazje komo personal di imigrashon na Kuerpo Polisial Kòrsou (KPC), i 3 miembro di Landsrecherche. Durante e okashon, Minister Hato a yama tambe un kordial bon biní na 4 empleado nobo di imigrashon ku awe a kuminsá nan promé dia di trabou.

Fortalesimentu di Kòntròl na Frontera

Minister Hato a indiká ku kresementu di turismo na Kòrsou ta trese mas buelo, mas bishitante i mas responsabilidat pa personal di imigrashon. Pa e motibu aki, ta importante pa sigui invertí den personal ku por garantisá un kontrol di frontera efisiente, profeshonal i sigur. E 9 personal ku ta inisiá ku stazje i 4 empleado nobo ta kontribuí na e fortalesimentu di kapasidat di kontrol na frontera.

Landsrecherche i integridat

Dirigiendo su mes na e 3 miembro di Landsrecherche ku a huramentá, Minister Hato a enfatisá e papel importante di e institushon den protehá integridat i konfiansa den nos estado di derecho. “Konfiansa no ta algu ku nos por eksigí. Konfiansa ta algu ku nos mester ganá tur dia atrobe, pa medio di nos akshonnan. Den un estado di derecho, niun hende no ta riba lei,” Minister Hato a deklará. Na final di e seremonia, Minister Hato a felisitá tur esnan ku a huramentá i e empleadonan nobo, i a deseá nan hopi éksito den nan responsabilidatnan. “Sirbi nos pais den sektor di hustisia no ta simplemente un trabou. E ta un kompromiso ku seguridat, integridat, estado di derecho i futuro di nos Kòrsou,” Minister Hato a konkluí.