Siman di Kaha di Òrgel 2026

Siman di Kaha di Òrgel 2026

“Damanan na Timon”: Siman di Kaha di Òrgel 2026 ta pone un lus riba nos damanan: Sharine Rosinda i Ridia Luciano ku ta keda honrá e aña aki

WILLEMSTAD – Ministerio di Enseñansa, Siensia, Kultura i Deporte, den kolaborashon ku Plataforma Kaha di Òrgel, ta anunsiá ku Siman di Kaha di Òrgel 2026 ta tuma lugá di 15 pa 22 di novèmber 2026. E tema e aña aki ta“Damanan na Timon”. E apertura ta riba djasabra 14 di novèmber 2026, di 17:30 pa 22:00, na Plaza Wilhelmina na Punda.

E aña aki, énfasis ta riba e damanan ku ta baila i toka kaha di òrgel i ku nan talento, pashon i dedikashon, ta yuda mantené e tradishon bibu. Den e kuadro aki, señora Sharine Rosinda i señora Ridia Luciano ta risibí rekonosementu komo baluartenan di Siman di Kaha di Òrgel 2026. Den e anekso por tuma nota di tur informashon di e dos baluartenan ku ta keda honrá durante di e Siman di kaha di òrgel 2026. Informashon: Anesko di Siman di Kaha di Òrgel 2026

Siman di Kaha di Òrgel ta pone atenshon riba e balor históriko i kultural di e kaha di òrgel, su músika i e tradishonnan ku ta rondon’é. Despues ku Gobièrnu a deklará 2019 komo Aña di Kaha di Òrgel, na 2020 a proklamá un siman anual den novèmber dediká na e herensia aki. E selebrashon ta rekonosé e tokadónan, trahadónan di kaha, tokadónan di wiri, bailadónan, organisadónan di fiesta di kaha i famianan ku ta sigui duna bida na kaha di òrgel. E rekonosementu komo baluarte ta honra personanan ku, dor di nan kontribushon di hopi aña, ta yuda konservá, praktiká i transmití e tradishon.

Pueblo di Kòrsou ta keda invitá pa huntu bini un i tur na e apertura di Siman di Kaha di Òrgel 2026 djasabra 14 novèmber 2026 na Plaza Wilhelmina na Punda.