WSCC TA UNI NA YAMADA DI UNESCO PA ATENDÉ INTEGRALMENTE KU ‘BULLYING’  RESPET, EMPATIA I SEGURIDAT TA RESPONSABILIDAT DI NOS TUR

4 di november 2026

WSCC TA UNI NA YAMADA DI UNESCO PA ATENDÉ INTEGRALMENTE KU ‘BULLYING’ 

RESPET, EMPATIA I SEGURIDAT TA RESPONSABILIDAT DI NOS TUR

WILLEMSTAD – Na okashon di Dia Internashonal kontra Violensia i Bullying na Skol, inkluyendo Cyberbullying, un dia internashonal rekonosé pa e Organisashon di Nashonnan Uni (UNESCO). E aña aki, e konmemorashon ta tuma lugá riba 5 di novèmber.

Women Steering Committee Curaçao (WSCC) ta hasi un yamada urgente na nos komunidat pa uni forsa kontra tur forma di intimidashon, humiyashon i maltrato.

Riba e dia aki ta pone énfasis riba e nesesidat pa garantisá ku tur mucha tin derecho di sinti nan mes sigur, respetá, skuchá i protehá, tantu na skol, komo pafó di skol. Kada mucha tin derecho di krese i desaroyá den un ambiente kaminda ta respetá su dignidat i e por biba sin miedo di ‘bullying’.

‘Bullying’ no ta un wega, ni un kos di mucha so. E ta un problema serio ku por laga herida profundo den bida di un hende, spesialmente den bida di nos muchanan i hóbennan. E por afektá nan outoestima, nan salú mental, nan prestashon na skol i e konfiansa den nan mes.

‘Bullying’ por manifestá su mes na diferente manera: insulto, menasa, eksklushon sosial, difamashon, violensia físiko i tambe atraves di internèt i medio sosial, konosí komo ‘cyberbullying’.

Ningun mucha mester bai skol ku miedo. Ningun hóben mester sinti su mes ménos balioso pa motibu di palabra òf akshon di otro. Tur mucha tin derechi di sinti nan mes sigur, respetá i protehá na skol i pafó di oranan di skol.

WSCC ta hasi un yamada na mayornan, famia, maestronan, direktornan di skol, organisashonnan sosial i instansianan gubernamental pa asumí nan responsabilidat den prevenshon i kombatimentu di bullying.

Nos mester siña nos muchanan for di chikí e balor di respet, empatia, toleransia i solidaridat.

“Mayornan mester papia ku nan yunan, skucha nan sin husga i tuma nan preokupashonnan na serio.

Skolnan mester garantisá un ambiente sigur, kaminda kada mucha por siña, krese i desaroyá su potensial sin miedo di intimidashon òf humiyashon,” sra. Mirieta Lourens – de Lanoy presidente di WSCC a bisa.

Cyberbullying: un peligro ku no ta keda na skol so

“Den nos mundu digital, ‘bullying’ no ta para ora skol kaba. Mensahenan ofensivo, publikashonnan humiyante, menasa i difamashon riba medio sosial por sigui un mucha te den tur aspecto di su bida. WSCC ta hasi un yamada pa uso responsabel di teknologia i media sosial. Laga nos siña nos muchanan ku tras di kada pantaya tin un ser humano ku sentimento i dignidat.”

No keda ketu. Papia i aktuá.

Na esnan ku ta sufri ‘bullying’, nos ke bisa: “Bo no ta bo so. Bo tin balor. Bo tin derecho di ser respetá i protehá. Buska yudansa serka un adulto di konfiansa, un maestro, un mayor òf un profeshonal ku por asistí bo.”

“Na esnan ku ta testigu di ‘bullying’, nos ta hasi un yamada pa no bira kara. Silensio por laga e problema sigui krese. Un palabra di sosten, un akshon responsabel òf un aviso na un adulto por hasi un gran diferensha. Women Steering Committee Curaçao ta reafirmá su kompromiso pa sigui promové edukashon, konsientisashon i empoderamentu di mucha, hóben, muhé, hòmber i famia. Nos ta konvensí ku un komunidat mas sigur ta kuminsá ku e balornan ku nos ta siña den nos kasnan, skolnan i den nos trato ku otro,” sra. Lourens – de Lanoy a sigui bisa

Bullying no ta algu ku nos mester aseptá. Ta un komportashon ku nos mester stòp kuné.

“Laga nos traha huntu pa un Kòrsou kaminda kada mucha ta sinti su mes sigur, respetá, skuchá i balorá.”