Gabinete ke tin mihó bista riba drònnan no outorisá, promé prueba práktiko den haf di Rotterdam

Notisia | 06-11-2026 | 13:45

Drònnan ta ofresé hopi oportunidat i ta kontribuí na un Hulanda sigur, aksesibel i inovativo. Nan ta yuda ku inspekshon di brugnan i slùisnan, transporte di sanger i sosten na servisionan di emergensia durante insidentenan.

Na mes momentu, ta importante pa kombatí uso di drònnan sin outorisashon. Gabinete ta trahando riba un base di dato nashonal pa vuelonan di dròn na Hulanda.

Ku e desaroyo di e base di dato aki paso pa paso, mester bira mas fásil pa atendé uso di drònnan sin outorisashon, pero tambe pa stimulá e desaroyo di e aspektonan positivo di drònnan.

E promé prueba práktiko lo kuminsá ainda e aña aki den haf di Rotterdam.

Durante 2025, den un periodo relativamente kòrtiku, a sosodé vários insidente ku drònnan no outorisá, entre otro serka basenan aéreo di Defensia i Aeropuerto di Eindhoven.

Komo reakshon riba esaki, e gabinete anterior a establesé un grupo di trabou spesial (taskforce) pa kombatí e tipo di uso di drònnan aki.

Te awor no tin indikashon ku e menasa di drònnan pa seguridat nashonal a oumentá, pero naturalmente esaki por kambia den futuro.

P’esei, durante e último aña ya a tuma diferente medida. E kreashon di e base di dato nashonal ta e siguiente paso.

E base di dato

Tantu organisashonnan privá komo instansianan gubernamental tin un papel importante den mantenementu di seguridat di e espasio aéreo na Hulanda.

Sinembargo, aktualmente e informashon tokante kua dròn ta bula na kua lugá ta repartí entre diferente organisashon i sistema.

Pa e motibu ei, no tin un bista kompleto di tur e tráfiko di drònnan na Hulanda.

Ku un base di dato nashonal, lo reuní informashon di tantu sektor privá komo instansianan gubernamental.

Di e manera aki, lo por haña un bista mas kompleto di e tráfiko di drònnan i fasilitá intervension ora tin vuelonan di dròn sin outorisashon.

Prueba práktiko den haf

Tin diferente método pa detektá drònnan. Esaki por sosodé, por ehèmpel, a base di frekuensianan di radio, zonido, òf ku yudansa di kamera i radar.

Durante e prueba práktiko den haf, empresanan i instansianan gubernamental lo haña eksperensia ku inovashonnan den e teknologianan aki.

Tambe nan lo interkambiá informashon for di nan sistemanan, pa asina por haña un bista kompleto di tur dròn ku ta bula den área di haf.

Ademas, nan lo por haña eksperensia ku servisionan di U-space.

U-space ta e sistema europeo di maneho di tráfiko aéreo pa uso sigur di drònnan den espasio aéreo. E sistema aki ta yuda tambe pa distinguí entre drònnan ku ta operá di manera legítimo i drònnan ku por representá un menasa.

E prueba den haf ta e promé paso.

E intenshon ta pa, den e añanan siguiente, agregá otro áreanan importante na e base di dato:

• 2027: Aeropuerto di Schiphol.

• 2028: Laman Nort i e infrastruktura vital ku ta situá den e área ei.

• Rumbo pa 2030: Otro instalashonnan i servisionan públiko i privá ku ta di importansia vital pa Hulanda.

Aktualmente, drònnan ya ta wordu usá den haf di Rotterdam, entre otro pa kontrolnan di seguridat, transporte di sierto material i produkto, inspekshon di infrastruktura i pa reakshon rápido komo promé unidat di asistensia (first responder) durante kandela i otro insidente.

Sentro Nashonal di Ekspertisio

Banda di e base di dato, tambe a establesé un Sentro Nashonal di Ekspertisio, kaminda organisashonnan ku ta di importansia krítiko por akudí ku nan preguntanan òf petishonnan di asistensia.

E sentro di ekspertisio aki a kuminsá funshoná den e di tres kuartal di 2026.

E desaroyonan i inovashonnan ku lo resultá for di e pasonan aki lo stimulá e sektor di drònnan na Hulanda ainda mas.

Drònnan ya ta ofresé hopi oportunidat pa Hulanda i aktualmente nan ta wordu apliká den diferente tereno, manera inspekshon di dèk i brugnan, òf transporte médiko entre hospitalnan.

Agenda Stratégiko pa Aviashon sin Pilòt

Pa stimulá e desaroyo di e sektor di drònnan ainda mas, gabinete ta trahando riba un Agenda Stratégiko pa Aviashon sin Pilòt.

Den e agenda aki lo stipulá kon Hulanda por hasi mihó uso di e oportunidatnan ku drònnan ta ofresé i kon por sigui desaroyá e sektor.

Un di e akshonnan ta organisashon di un Kumbre Nashonal di Dròn (Nationale Drone Top) den e promé mitar di 2027.

E meta di e kumbre aki ta pa reuní tur e partinan envolví i fortalesé e kolaborashon entre nan.