Ofisina di Prekario Karnaval 2027 a habri na World Trade Center Curaçao

Willemstad – Gobiernu di Kòrsou ta informá ku for di djaluna 9 di novèmber 2026, ofisina di Prekario Karnaval 2027 a habri su portanan na World Trade Center (WTC) Curaçao, na Piscadera.

Na e ofisina aki, tur persona ku ta interesá den un espasio riba ruta di Karnaval 2027 por dirigí nan mes pa hasi nan registrashon di Prekario. Tambe, personanan ku ke inskribí nan mes riba lista di espera di Prekario por hasi esaki na e mesun lokalidat.

Lugá i orario di atenshon

E ofisina ta situá na World Trade Center (WTC) Curaçao, na Piscadera, i ta atendé públiko di djaluna te ku djabièrnè, di 9:00 di mainta te 4:30 di atardi, sin pausa.

Nos ta invitá tur kliente pa registrá online via https://prekario.vvrp.cw, i pa mas asistensia por hasi uso di e ofisina na WTC. Tambe ta pidi tur kliente pa atendé tur asuntu di Prekario na tempu.

E periodo di registrashon di Prekario Karnaval 2027 a kuminsá dia 2 di novèmber 2026 i ta kontinuá te ku 30 di novèmber 2026.

Gobiernu ta hasi un yamada na tur persona interesá pa registrá na tempu i hasi uso di e servisio di e ofisina pa risibí informashon i asistensia durante e proseso.

E proseso di Prekario Karnaval 2027 ta un kolaborashon entre Ministerio di Tráfiko, Transporte i Planifikashon Espasial (VVRP) i Ministerio di Enseñansa, Siensia, Kultura i Deporte (OWCS).