Yamada urgente pa protekshon di abitantenan kontra kriminalidat digital i froude finansiero di QuickPromo
Minister Presidente
Sr. Gilmar Pisas
Minister di Finansa
Sr. Charles Cooper
Minister di Hustisia
Sr. Shalten Hato
Willemstad, 10 novèmber 2026
Tópiko: Yamada urgente pa protekshon di abitantenan kontra kriminalidat digital i froude finansiero di QuickPromo
Apresiabel minister,
Suskrito, miembro di frakshon di Movementu Futuro Kòrsou den Parlamento di Kòrsou, mr.drs. Javier Silvania, ta pidi bo atenshon pa e grupo kriminal di QuickPromo ku a estafa pueblo di Kòrsou. Ku e karta aki, mi ta skirbi pa pidi bo atenshon urgente pa loke ta trata un situashon agudo ku aktualmente ta afektá finansieramente segun sifra no konfirmá alrededor di 7.000 abitantediKòrsou. Ta trata di e aplikashon online ku ta operá bou di e nòmber QuickPromo, tambe konosí komo QP313.com.
Manera ta bisto for di atvertensianan resien di entre otro Banko Sentral di Curaçao y Sint Maarten (CBCS) y Gobierno di Curaçao, siudadanonan ta wòrdu aserka ku promesanan di entrada rápido a kambio di ehekutá tareanan simpel online. Sinembargo, tin preokupashonnan serio ku e plataforma aki ta eksponé karakterístikanan di un sistema froudulento, den kua partisipantenan ta wòrdu enkurashá pa invertí montantenan kada bes mas grandi.
Usuarionan ta wòrdu sedusí, pa medio di preshon sikológiko i títulonan fiktisio manera “City Manager,” entre otro medionan, pa depositá sumanan grandi di kriptomoneda, inkluyendo USDT, pa asina desblòkia nivelnan mas haltu. Ora ku e retironan ta wòrdu blòkiá despues, e víktimanan ta wòrdu konfrontá ku petishonnan pa paga plaka atrobe bou di e kapa di, por ehèmpel, “belasting” òf “gastu di aktivashon.”
Como resultado, hopi siudadano riba nos isla ta kore riesgo di pèrdè sumanan supstansial y posiblemente tur nan sèn di spar. E posibel konsekuensianan sosial i ekonómiko pa famianan i e komunidat di Kòrsou ta serio.
Mirando bo posishon komo minister kende ta polítikamente responsabel pa Banko Sentral mi ta urgi bo pa usa bo outoridat pa atendé e siguiente puntonan, kaminda ta posibel, pa aselerá nan resolushon:
Enforsamentu di lei estrikto
Insistí riba un investigashon polisial den koperashon ku Banko Sentralriba e aktividatnan di QuickPromo i kualke promotor òf gerente lokal riba Kòrsou, pa asina por rekuperá e sèn di e víktimanan i prevení mas daño finansiero.
Segun informashon ku nos ta dispone di dje ta fo’i aña pasa QuickPromo ta aktivo na Kòrsou.
Parlamentario Silvania tin e siguiente preguntanan
- Fo’i ki dia e kompania Quick Promo ta establesé na Kòrsou? Fo’i ki dia Quick Promo a kuminsá ku su aktividatnan na Kòrsou?
- Foi ki dia Banko Sentral a risibí e promé señal ku QuickPromo ta aktivo riba e merkado lokal? For di ki tipo di fuente di informashon Banko Sentral a risibí e señal?
- Ki pasonan konkreto, no-konfidensial Banko Sentral a tumá for di dia ku QuickPromo a establesé na Kòrsou te ku 17 di sèptèmber 2026?
- Fo’i ki dia polis a risibí señalku QuickPromo ta estafa klientenan na Kòrsou? Kiko polis a hasi ku e señal òf keho? Kiko ta e resultado di e investigashon polisial? 5. Ki dia Banko Sentral a manda un atvertensia pa públiko tokante e riesgo di hinka sèn den QuickPromo?
- Dikon Banko Sentral a tarda asina tantu pa informá komunidat di e riesgo ku e partisipantenan ta kore?
- Kua kriterio ta determiná si i ki ora un atvertensia públiko spesífiko di Banko Sentral ta nesesario?
- A investigá si QuickPromo tabata ofresé aktividatnan pa kua ta nesesario un pèrmit, registrashon òf outorisashon di Banko Sentral?
Den promé bista, parlamentario Silvania ta mira ku e aktividatnan di QuickPromo por tin relevansia ku entre otro e lei di ‘virtuele activa’. E lei aki ta stipulá ku ta obligatorio pa tin un ‘vergunning’, ‘ontheffing’ òf ‘vrijstelling’ pa por ehekutá e aktividatnan na Kòrsouku ta menshoná den e lei.
Den e kaso ku un empresa tin aktividatnan ku ta kai bou di e leinan di supervishon, ta rekomendabel pa presentá e ‘business model’ na Banko Sentral. Asina Banko Sentral por evaluá e aktividatnan i indiká si ta nesesario pa opten’é algun forma di outorisashon, manera un ‘vergunning’, ‘ontheffing’ òf ‘vrijstelling’ pa aktividatnan finansiero, di invershon, di pago òf relashoná ku kriptomoneda.
E investigashon di Banko Sentral riba QuickPromo mester enfoká, entre otro, riba e infrastruktura tékniko, e forma ku ta reklutá partisipantenan, e modelonan di entrada presentá, transakshonnan relashoná ku kriptomoneda, i riesgonan finansiero pa abitantenan di Kòrsou.
Den kaso ku QuickPromo no a tuma kontakto ku Banko Sentral nos ta spera ku nos instituto nashonal ku ta responsabel pa supervisá aktividatnan finansiero, di invershon, di pago òf relashoná ku kriptomoneda ta pro aktivo. Pa asina protehá nos komunidat kontra estafador nan.
Pregunta:
- Ora ku QuickPromo a kuminsá ku su aktividatnan na Kòrsou Banko Sentral a evaluá e business model di QuickPromo pa determiná si e aktividatnan di e empresa ta kai bou di e leinan di supervishon? Kiko ta e resultado di e investigashon aki? Parlamento por haña e resultado di e investigashon aki te kaminda ta legalmente permití?
10.Dikon Banko Sentral a permití pa QuickPromo operá sin optené algun forma di outorisashon, manera un ‘vergunning’, ‘ontheffing’ òf ‘vrijstelling’ pa aktividatnan finansiero, di invershon, di pago òf relashoná ku kriptomoneda?
For di mart 2026, e kompania Cyber Breach a bin ta kondusí investigashon independiente di seguridat sibernétiko i OSINT den QuickPromo. Riba 11 di ougùstùs 2026 Cyber Breach a manda un petishon por eskrito pa Banko Sentral. Den e karta Cyber Breach a hasi 5 pregunta spesífiko tokante:
- E konosementu di Banko Sentral di Quick Promo i e dominio qp313.com.
- E eksistensia di lisensia, registrashon òf outorisashon pa aktividatnan finansiero, invershon, pago òf relashoná ku kriptomoneda.
- Kualke investigashon òf evaluashon di supervishon ku ta andando. • Kehonan, rapòrtnan òf señalnan ku a wòrdu risibí kaba.
- Kualke atvertensia òf konseho na konsumidónan.
Hasiendo esaki, Cyber Breach a indiká eksplísitamente ku e petishon ta destiná pa prevení konklushonnan inkorekto di parti di Banko Sentrali ku Cyber Breach ta dispuesto pa duna ‘screenshot’ relevante, dato di dominio, propaganda i otro
fuentenan digital di QuickPromo. Cyber Breach no a risibí un kontesta di Banko Sentral.
Parlamentario Silvania ta haña esaki preokupante, komo ku e petishon ta relashoná ku riesgonan finansiero pa konsumidónan i a originá for di un investigashon independiente.
Atvertensianan públiko siguiente
Parlamentario Silvania ta dispone di informashon ku QuickPromo tin mas ku 1 aña aktivo na Kòrsou. Riba 1 july 2026 parlamentario a avisá pueblo di Kòrsou riba su Facebook i na Radio Vishon pa NO hinka sèn den QuickPromo. Riba 17 di sèptèmber 2026 Banko Sentral a emití atvertensia públiko tokante QuickPromo i programanan di invershon similar manera, Kòrsou Legacy Capital i Elite Wealth Forum. Dia 9 di novèmber 2026, Banko Sentral a bolbe emití un atvertensia tokante QuickPromo, parsialmente komo kontesta riba informenan di pagonan adishonal di USD 300 i difikultatnan finansiero denter di e organisashon.
Esaki ta lanta e siguiente preguntanan serka parlamentario Silvania.
11.Ki informashon Banko Sentral tabata poseé di QuickPromo for di 2025? Kua medidanan a wòrdu konsiderá òf tuma den e periodo for di 2025 te ku 17 sèptèmber 2026?
12.Dikon Banko Sentral a warda mas ku 1 aña promé ku e atvertensianan pa no hinka sèn den QuickPromo a sali?
13.Kon e karta di Cyber Breach di 11 di ougùstùs a keda atendé dor di Banko Sentral i kua medidanan a wòrdu konsiderá òf tuma den e periodo intermedio (11 ougùstùs -17 sèptèmber)?
Parlamentario Silvania ta preokupá pa loke ta trata e maneho di señalnan di atvertensia trempan dor di Banko Sentral. Parlamentario Silvania no ta afirmá, sin mas investigashon, ku Banko Sentral a violá su obligashonnan legal. Sinembargo, parlamentario Silvania ta di opinion ku e susesonan ta lanta preguntanan serio tokante e efektividat di e maneho di señalnan di supervishon eksterno, e velosidat di análisis di riesgo, i komunikashon ku e pueblo di Kòrsou i partidonan eksterno ku ta reportá riesgonan finansiero.
Ta di interes públiko pa determiná si señalnan di atvertensia trempan ta wòrdu registrá, evaluá, i, kaminda ta nesesario, eskalá na tempu. Si Banko Sentral for di 2025 a saka atvertensia kontra di QuickPromo awe nos no ta den e situashon aki. Segun un representante di QuickPromo 7.000 hende lokal ta partisipá den QuickPromo. Parlamentario Silvania tin informashon no konfirmá ku 3.000 abitante a hinka sèn den QuickPromo den sèptèmber. Sin konta partisipantenan di Hulanda, Sint Maarten, Bonaire i Aruba. Segun informashon ku parlamentario Silvania ta dispone di dje e promé grupo di hendenan ku a hinka sèn den QuickPromo tabata dosentenan. Parlamento Silvania tin informashon ku un grupo di 30 víktima di QuickPromo a pèrdè alrededor di USD 85.000. Vários persona afektá a deklará ku nan no tin akseso mas na nan kuenta di QuickPromo.
Interkambio di Informashon Regional
14.Kua atvertensia òf señalnan spesífiko tokante QuickPromo tabata konosí pa reguladornan riba otro islanan di Karibe òf otro kaminda promé ku 17 di sèptèmber 2026?
15.Banko Sentral a risibí informashon di e Trinidad i Tobago Securities and Exchange Commission (TTSEC) òf otro reguladornan regional promé ku 9 di novèmber 2026? 16.Si informashon regional tabata disponibel: riba ki fecha el a wòrdu risibí i kon el a wòrdu pisa den e análisis di riesgo?
17.Tin un protokòl pa interkambio transfronteriso di señalnan tokante aktividatnan finansiero potensialmente ilísito? Esaki a wòrdu apliká?
Protekshon i Komunikashon di Konsumidó
18.Ki atvertensianan públiko tokante QuickPromo a wòrdu emití dor di Banko Sentral, inkluyendo fechanan di publikashon eksakto i referensianan na e tekstonan original?
19.Kon a evaluá e efektividat i alkanse di e atvertensia di sèptèmber, den lus di aktividatnan promoshonal lokal?
20.Ki informashon òf sirkunstansianan nobo a forma e base pa e spièrtamentu spesífiko di 9 di novèmber 2026?
21.Banko Sentral a konsiderá pa emití atvertensia adishonal òf mas dirigí entre sèptèmber i novèmber? Ki konsiderashonnan tabata desisivo den esaki? 22.Banko Sentral por indiká, den forma agregá, kuantu rapòrt òf keho tokante QuickPromo a wòrdu risibí pa luna, te kaminda ta legalmente permití?
Koperashon, supervishon i responsabilidat
23.Ki kriterio Banko Sentral ta apliká pa manda señalnan na KPC, FIU, Ministerio Públiko, Servisio di Impuesto òf otro outoridatnan kompetente?
24.Interkambio di informashon tokante QuickPromo a tuma lugá ku outoridatnan investigativo, te kaminda un kontesta general ta legalmente posibel? 25.Por duna un liña di tempu anónimo di risibí, evaluashon, eskalashon i siguimentu públiko via minister di Finansa, miéntras ta respetá e posishon independiente di Banko Sentral?
26.Ki medidanan di mehorashon Banko Sentral ta konsiderá pa registrá atvertensianan eksterno mas lihé i pa duna feedback apropiá na esnan ku a hasi e señalamentu?
27.Banko Sentral a evaluá si e komunikashon pa ku públiko general tokante QuickPromo por tabatin daño finansiero limitá, si Banko Sentral a saka atvertensia mas trempan?
28.Ki medidanan di mehorashon Banko Sentral ta konsiderá pa ku komunikashon na e públiko en general tokante plataformanan online ku ta operá sin ningun regulashon di Banko Sentral?
E preguntanan no ta destiná pa antisipá eventual negligensia òf falta di responsabilidat di Banko Sentral. Parlamentario Silvania ta pidi un rekonstrukshon verifikabel di e tempu di konsientisashon, e maneho di un señal eksterno spesífiko, i e konsiderashonnan ku ta basa e atvertensianan públiko. Partikularmente den kaso di riesgonan finansiero transfronteriso, e importansia sosial di señalamentu na tempu i responsabilidat ta signifikante.
Kampañanan di konsientisashon públiko
Parlamentario Silvania ta konsehá pa inisiá un kampaña di atvertensia ampliamente sostené via radio, televishon, koranti medionan sosial, pa asina siudadanonan ta wòrdu informá na tempu tokante e riesgonan di plataformanan di invershon i tarea online pa asina mas víktima por wòrdu prevení.
Asistensia i kuido despues pa víktimanan
Parlamentario Silvania ta konsehá pa investigá e posibilidatnan pa duna sosten sentralisá na abitantenan afektá, inkluyendo sigurá datonan relevante, protehá kuentanan di banko i digital, i entregá rapòrtnan na outoridatnan kompetente. Pa asina e kriminalnan aki wòrdu persiguí pa Ministerio Públiko.
E abitantenan di Kòrsou tin mester di protekshon desisivo kontra kriminalidat digital i froude finansiero. Mi ta konfia ku Minister lo tuma e súplika urgente aki na serio i, denter di bo kapasidat, komprometé na fortifiká e seguridat finansiero i protekshon di abitantenan di Kòrsou. Parlamentario Silvania ta pidi e víktima pa warda e resultado di investigashon ku trankilidad. I no hasi nada ku despues bo ta lamentá.
Parlamentario Silvania ta apresiá si minister por duna kontesta riba e preguntanan hasí por eskrito den un término rasonabel. Sperando riba bo kontesta i kualke otro paso, mi ta keda,
Sinseramente,
Atentamente,
Mr.drs. Javier Silvania,
Parlamentario pa
frakshon di MFK
