Huntu pa un Kòrsou Limpi

Un paso mas den desaroyo i partisipashon di nos siudadanonan

Willemstad, Kòrsou – Ministerio di Desaroyo Sosial, Labor i Bienestar (SOAW), den kolaborashon ku Selikor i Sosten B.V., a duna inisio na e proyekto Huntu pa un Kòrsou Limpi.

E proyekto aki ta dirigí riba personanan ku ta risibí asistensia sosial (ònderstant), ku mediante un trayekto di siña i traha ta haña e oportunidat pa desaroyá nan abilidatnan, haña eksperensia di trabou i prepará nan mes pa un futuro riba merkado laboral.

Durante e trayekto, e partisipantenan ta kontribuí aktivamente na limpiesa di nos isla, miéntras ku nan ta desaroyá disiplina, sentido di responsabilidat, trabou den ekipo i konfiansa den nan mes.

Selikor ta fasilitá e oportunidat pa e partisipantenan haña eksperensia práktiko, miéntras ku Sosten B.V. ta responsabel pa e guia i sosten psikososial di e partisipantenan durante e trayekto. E kombinashon di eksperensia laboral i guia personal ta importante pa prepará e partisipantenan pa un siguiente paso riba merkado laboral.

SOAW, Selikor i Sosten B.V. ta satisfecho ku e kuminsamentu i desaroyo di e trayekto te  awor. E partisipantenan ta mustra motivashon i kompromiso den e trabou ku nan ta realisá, loke ta duna un base positivo pa e kontinuashon di e proyekto.

E meta no ta solamente pa ofresé un oportunidat temporal di trabou, sino pa duna e partisipantenan un base sólido pa nan por sigui desaroyá nan mes, pasa pa un trayekto di eksperensia laboral i finalmente logra haña un trabou regular.

Ku Huntu pa un Kòrsou Limpi, SOAW ta sigui invertí den desaroyo di nos siudadanonan, kreando oportunidatnan pa nan bira mas independiente i, na mes momentu, kontribuí na un Kòrsou mas limpi.

Huntu nos ta traha pa un Kòrsou mas limpi, ku mas oportunidat pa nos siudadanonan.