KOLONAN NASHONAL I BLUE WAVES TA FORMA E UNIFORM DI KAS DI KÒRSOU!
KOLONAN NASHONAL I BLUE WAVES TA FORMA E UNIFORM DI KAS DI KÒRSOU!
Federashon di Futbòl Kòrsou, adidas i Voetbalshop.nl ku orguyo ta presentá e unifòrm di kas nobo di nos selekshon nashonal di futbòl. E unifòrm di kas nobo ta konsistí di e kolonan nashonal di Kòrsou, ku e blou di shelu i laman komo base, e hel di solo komo kolo di aksento i e blanku den e logo di federashon. Komo un referensia na e nòmber di kariño di nos tim, The Blue Wave, riba e manganan tin olanan karakterístiko riba blou kla.
Detayenan distintivo
Komo un nashon relativamente nobo riba e esena mundial, a skohe pa mustra e nòmber di nos pais mas tantu ku ta posibel, ku e nòmber “Curaçao” prominentemente den e parti dilanti di e unifòrm. Na banda tras di e kamisa tambe ta regresá e kolonan nashonal i olanan. Karakterístiko ta e garganta multi- kolorido di e kamisa, e rant abou di e shòrt i tambe e dobla di mea, ku ta forma un unifòrm ku un aparensia sumamente atraktivo.
Presidente di FFK Gilbert Martina a bisa “Nos ta sumamente orguyoso ku finalmente nos por kompartí e resultado ku nos a realisá den un proseso intensivo huntu ku representashon di FFK, e hungadónan i staf, adidas i Voetbalshop.nl. E unifòrm aki ta pone Kòrsou na mesun nivel ku paisnan manera Argentina, Spaña i Alemania. Nos bunita kolonan nashonal ta sali bon dilanti, i e olanan ta konta nos historia na mundu. Di The Blue Wave, di e olanan ku ta rondo di nos tur dia, for di Watamula te Oostpunt, pero prinsipalmente tambe komo símbolo di e firmesa i resistensia di e isla i nos pueblo.”
Debut riba vèlt
The Blue Wave lo debutá den e unifòrm di bishita nobo durante e wega kontra Eskosia djasabra 30 di mei próksimo, miéntras ku e debut di e unifòrm di kas lo tuma lugá na Kòrsou kontra Aruba djasabra 6 di yüni próksimo. E nòmbernan i numbernan di e hungadónan ta den hel.
Nos tim tin tambe un shòrt i mea blou, pero tambe un set hel komo alternativa.
Disponibel mesora
E unifòrm nobo di kas ta disponibel mesora, banda di e unifòrm di bishita, unifòrm di entrenamentu i unifòrm ku ta usa ora ta biaha. Na Kòrsou e kolekshon ta eksklusivamente disponibel na e Fanshop ofisial FFK (Sambil), i na Hulanda i Bélgika eksklusivamente na tiendanan di Voetbalshop i riba Voetbalshop.nl/Curaçao. Den otro paisnan na Europeo e unifòrmnan ofisial ta disponibel riba Voetbalshop.nl/Curaçao, adidas.com i den adidas Stores na Paris, London i Berlin. Fanátikonan na Merka por bai na Voetbalshop.nl/Curaçao, adidas Stores i punto ofisial di benta durante e weganan di The Blue Wave.
Tokante Federashon di Futbòl Kòrsou
Federashon di Futbòl Kòrsou ta e órgano ofisial pa futbòl na Kòrsou i ta responsabel pa e organisashon, desaroyo i promoshon di e deporte na tur nivel riba e isla. Komo miembro di FIFA i CONCACAF, FFK ta representá Kòrsou internashonalmente i ta supervisá e timnan nashonal, inkompetensianan lokal, formashon di entrenadó i desaroyo di talento.
Basá riba prinsipionan di integridat, union i ekselensia, FFK ta komprometé pa fortalesé futbòl komo un medio pa impakto sosial, orguyo nashonal i rekonosimentu internashonal.
E federashon ta hunga un ròl sentral den inspirá partisipashon di hóbennan, promové futbòl femenino i konstruí infrastruktura sostenibel di futbòl na henter Kòrsou.
Despues di e klasifikashon históriko di Kòrsou pa FIFA WK 2026, FFK ta sigui ku su vishon stratégiko enfoká riba prestashon, reforma di e forma ku ta manehá, invershon den base i kolaborashon internashonal, posishonando futbòl komo katalisadó pa un mente sano, komunidatnan fuerte i desaroyo nashonal.
Tokante adidas Football
adidas ta e lider mundial den futbòl. E ta e proveedó ofisial di e torneonan di futbòl mas importante na mundu, manera FIFA World Cup, UEFA EURO i UEFA Champions League. adidas ta spònser tambe di algun klup di futbòl mas grandi di mundu, inkluyendo Real Madrid, Liverpool, Manchester United, Arsenal, FC Bayern München i Juventus.
adidas ta partner tambe di algun di e mihó futbolista maskulino i femenino, inkluyendo Aitana Bonmati, Trinity Rodman, Vivianne Miedema, Alessia Russo, Leo Messi, Jude Bellingham, Mohamed Salah, Pedri, Lamine Yamal, Florian Wirtz i hopi otro.
Tokante Voetbalshop.nl
Badge Company (Badge) a keda lanta na 1977. Pa medio di su plataforma prinsipal, Voetbalshop.nl, ta e retailer lider di futbòl i organisashon di merchandising deportivo ku lisensia den Hulanda i Bèlgika. Badge a kuminsá komo e promé titular pan-Europeo di lisensia pa vários kompetensia i federashonnan deportivo Merikano i Europeo, inkluyendo UEFA Champions League, UEFA EURO i programanan FIFA World Cup.
Voetbalshop ta e partner ofisial di e-commerce di KNVB (Federashon Hulandes di Futbòl) i FFK (Federashon di Futbòl Kòrsou). Ambos paisnan lo ta representá pa nan ekiponan nashonal durante FIFA WK 2026 na Merka, Canadá i Méksiko.
21 di mei 2026
