Ministerio di GMN ta enfatisá: BON KÖPERASHON ENTRE PARTNERNAN PÚBLIKO I PRIVÁ TA ESENSIAL PA PROTEHÁ SALUBRIDAT PÚBLIKO
Ministerio di GMN ta enfatisá:
BON KÖPERASHON ENTRE PARTNERNAN PÚBLIKO I PRIVÁ
TA ESENSIAL PA PROTEHÁ SALUBRIDAT PÚBLIKO
WILLEMSTAD — Ministerio di Salubridat, Medio Ambiente i Naturalesa (GMN) ta informá pa medio di e komunikado aki tokante e último desaroyonan internashonal relashoná ku e epidemia di Ébola ku tin aktualmente, na un parti di Afrika, esta na Repúblika Demokrátiko di Kongo (DRC) i i tambe na Uganda kaminda tin algun kaso, okashoná pa e variante yamá Bundibugyo.
Situashon aktual
Djadumingu último, dia 17 mei 2026, Organisashon Mundial di Salú (WHO) a deklará e epidemia komo un Emergensia di Salú Públiko di Importansia Internashonal òf na ingles “Public Health Emergency of International Concern” (PHEIC).
Te ku 19 mei 2026, Ministerio di Salú di Repúblika Demokrátiko di Kongo i Uganda a raportá ofisialmente un total di 536 kaso sospechoso, 105 kaso probabel, 34 kaso konfirmá i 134 persona ku a fayesé.
Riesgo pa region Karibe, inkluso Kòrsou
Organisashonnan internashonal di salú ta konsiderá e riesgo na e momentonan aki abou pa e region di Karibe, inkluso Kòrsou. Si bo ta biahando pa partinan di Afrika, ta rekomendabel pa wak kua área di Afrika tin kasonan di Ébola promé ku biaha.
Ébola
Ébola ta un malesa infeksioso serio ku ta wòrdu okashoná dor di un vírus, ku por kousa sangramentu den kurpa. Ébola ta presentá solamente den algun parti di Afrika. Kontagio di persona pa persona ta tuma lugá dor di kontakto direkto ku sanger òf otro líkido di kurpa di un persona infektá. Ébola no ta ser transmití via airu, manera dor di tosa òf nister.
Ministerio di GMN ta enfatisá ku bon köperashon entre partnernan públiko i privá ta esensial pa protehá salubridat públiko. Lo sigui monitoriá e situashon internashonalmente, den estrecho koperashon ku outoridatnan den salubridat lokal, regional i internashonal. Si ta nesesario, lo sigui informá komunidat debidamente.
