Minister Boekhoudt ta representá Reino durante World Health Assembly na Ginebra
Salubridat Públiko, Medio Ambiente i Naturalesa
Minister Boekhoudt ta representá Reino durante World Health Assembly na Ginebra
Publiká riba 21 Mei 2026
Ginebra, 20 di mei 2026. Minister di Salubridat, Medio Ambiente i Naturalesa, Tyron Boekhoudt, a partisipá aktivamente e siman aki na e di 79 Asamblea Mundial di Salubridat (World Health Assembly) di World Health Organization (WHO) na Ginebra, komo parti di e delegashon di Reino Hulandes. E World Health Assembly ta e plataforma mundial mas importante di salubridat públiko.
Durante e bishita di trabou, minister Boekhoudt a forma parti di diferente reunion di nivel, haltu, konsultanan bilateral i seshonnan internashonal tokante asuntonan mundial di salubridat. Entre e temanan tabatin preparashon pa pandemia, finansiamentu di kuido, prevenshon, akseso na remedi i reformanan den sistema di salubridat.
Un parti importante di e bishita tabata e reunion organisá pa embahadó di Hulanda, Erica Schouten, ku e tema ‘Health Security, Pandemic Preparedness & Resilience’. Na e reunion aki tabatin representantenan presente di World Health Organization, Union Europeo, Spaña, Australia, Rwanda, Hulanda, Kòrsou i tambe e presidente di e Africa Centres for Disease Control and Prevention.
Minister Boekhoudt a enfatisá durante e reunionnan e importansia di solidaridat internashonal i kooperashon entre paisnan, spesialmente pa islanan chikí manera Kòrsou, ku ta vulnerabel pa desaroyonan mundial den salubridat públiko.
Ademas, Minister Boekhoudt a duna dos diskurso importante na nòmber di Reino Hulandes komo Hefe di Delegashon (Head of Delegation).
Durante e reunion plenario di e World Health Assembly, minister a papia na nòmber di Reino tokante e tenshonnan geopolítiko mundial, e preshon riba kooperashon multilateral i e importansia di sistemanan di salubridat fuerte i resiliente. Den su deklarashon, e minister a enfatisá ku menasanan di salubridat, manera Ebola, Hantavirus, desasternan natural, atakenan sibernétiko (cyber attacks) i malesanan infeksioso, no ta konosé frontera i ku por enfrentá nan solamente pa medio di kooperashon internashonal i un World Health Organization fuerte.
Tambe Minister Boekhoudt a presentá un diskurso tokante Global Health Financing, na un reunion ku a keda ko-organisá pa Reino Hulandes i Indonesia. Den su diskurso, e minister a atvertí tokante e krísis mundial den finansiamentu di salubridat i e konsekuensianan ku esaki por tin pa kuido universal di salubridat i preparashon pa pandemia. El a indiká ku invertí den sistemanan di salubridat fuerte i kooperashon internashonal no ta un opshon, sino un nesesidat. Den e konteksto aki, el a referí eksplísitamente na e lesnan di COVID-19, Hantavirus i e brote aktual di Ebola.
Ademas, tabatin un reunion bilateral importante ku e direktora di Pan American Health Organization (PAHO). Durante e reunion aki a hasi diferente palabrashon konkreto riba mas kooperashon entre Kòrsou i PAHO pa lo siguiente:
- Un evaluashon di e pakete di seguro básiko (BVZ);
- Sosten tékniko pa implementashon di e programa HEARTS, enfoká riba prevenshon i promé liña di kuido;
- Adheshon na e Strategic Fund pa kompra konhunto di remedi;
- Sosten tékniko pa reforma i fortalesementu di e sistema di salubridat di Kòrsou;
Preparashon di un Country Cooperation Strategy pa futuro entre Kòrsou i PAHO.
Ku e partisipashon aktivo aki na e WHA, Kòrsou ta reafirmá su ambishon pa posishoná su mes internashonalmente komo un ‘small island reform case’ riba tereno di prevenshon, kuido aksesibel di salubridat, finansiamentu duradero i seguridat mundial di salubridat.
