Saliña ta keda vulnerabel pa inundashon.
Saliña ta keda vulnerabel pa inundashon.
Willemstad – Ministerio di Tráfiko, Transporte i Planifikashon Urbano (VVRP) ta informá e komunidat ku ta biba òf tin negoshi den Saliña ku no opstante tur e trabounan ku Servisio pa Obra Públiko a bin ta desplegá den e área aki, Saliña ta keda un lúga di riesgo di inundashon. Esta na momentu ku hopi awa kai e chèns te ainda ta eksistí ku e área aki por bai bou di awa.
Pa e motibu aki VVRP ke urgí tur ku ta biba den Saliña i tambe e komersiantenan ku tin negoshi den e área aki pa ta konsiente di e echo aki. Ta pidi tur habitante i tambe komersiante pa sigui semper e boletinnan di Servisio Meteorológiko i tuma medida si ta spera hopi awa. Medida ku por tuma ta: 1) pone merkansia i tambe poseshon na haltu, 2) sòru pa durante di periodo di awaseru semper tin saku di santu ku por usa pa dèmpel porta, 3) tin dokumentonan importante semper na man òf den saku di plèstik. Tambe ta bon pa revisá bo polisá di seguro pa wak si esaki ta inklui inundashon. Si esaki no ta e kaso, ta bon pa sera un seguro pa esaki.
Servisio pa Obra Públiko den su afan pa yega na un infrastruktura sostenibel i sigur lo sigui buska solushon duradero pa e problema di desague den Saliña riba termino korto i tambe riba termino largu huntu ku e profeshonalnan di UNOPS (United Nations Office for Project Systems).
