DIA INTERNASHONAL DI MAESTRO

DIA INTERNASHONAL DI MAESTRO

Kralendijk – Dia 5 di òktober 1994 UNESCO a proklamá dia internashonal di maestro. E aña aki e tema ta: “ Balorando maestronan, Perfekshonando nan posishon”

Riba e dia aki Diputado di komunidat di kuido, sra. Nina den Heyer kier a para ketu na e dia internashonal aki i ta rekonosé, balorá, honra i duna apresio na nos maestronan.

Enseñansa ta e medio mas importante riba tereno ekonómiko i sosial. E ta amplia konosementu i ta duna adulto i muchanan e oportunidat pa terminá ku pobresa i alkansá e medionan pa disfrutá di bida i partisipá optimalmente den nos komunidat.
Enseñansa ta esensial pa pone kada individuo sali dilanti pa nan mes.
Mas i mas enseñansa ta wòrdu rekonosé komo un di e mihó invershonnan ku un gobièrnu por hasi.
Importansia di enseñansa no ta solamente riba e tereno práktiko: un persona eduká ku un mente aktivo i salú ta un alegria i rekompensa pa e ser humano.

E trabou di un maestro ta un bunita trabou ku hopi responsabilidat.
E maestro durante su karera ta mira diferente generashonnan pasa su dilanti i tin diferente ròl den bida di e alumno.
Banda di e mayornan e maestro tambe ta kontribuí na edukashon di nos yunan. Su influensia den edukashon i formashon ta sumamente grandi.
E ta hasi su trabou ku amor i dedikashon. I pa esaki nos ta balorá i apresiá nos maestronan pa nan trabou desplegá.

Di parti gobièrnu di Boneiru nos kier a deseá nos maestronan, direktor- i direktivanan di skol riba e dia tan espesial aki un felis dia di maestro.