KOMUNIKADO relashoná ku Refineria Isla

Willemstad – Djaluna mainta alrededor di 7:45 Ministerio di Salubridat, Medio Ambiente i Naturalesa a keda notifiká dor di Refineria Isla ku pa motibu di difikultat ku e sistema di lubrikashon, un kòmprèser di gas di e planta Cat Cracker a kai afó. Konsekuensha di esaki ta ku lo mester kima e gasnan ku a keda den e sistema via “flairing” kontrolá i esaki ta okashoná temporalmente hopi huma pretu i posibel holó stinki.

Ta rekomendá habitantenan ku ta eksperenshá molèster di e situashon aki pa tene bentana i porta será mas tantu posibel. Ministerio ta keda den kontakto estrecho ku Refineria Isla i lo keda vigilá e situashon. Pa mas informashon por tuma kontakto ku Ministerio di Salubridat,
Medio Ambiente i Naturalesa via number di telefòn 0800 0877.