Partido MAN ta kla pa elekshon i ta deklará ku no tin niun palabrashon ku ningun otro partido pa forma ningun gobièrnu promé ku elekshon. Partido MAN ta laga pueblo papia

Partido MAN ta kla pa elekshon i ta deklará ku no tin niun palabrashon ku ningun otro partido pa forma ningun gobièrnu promé ku elekshon. Partido MAN ta laga pueblo papia

WILLEMSTAD – Si pueblo duna partido MAN sufisiente asiento pa e sali mas grandi, nos partido lo start e proseso pa yega na un gobièrnu di Kòrsou mesora. Pueblo di Kòrsou meresé un gobièrnu ku ta traha na bienestar di pueblo, ku ke hisa nivel di bida di nos pueblo, kore ku tur forma di korupshon den gobernashon i hiba un gobernashon huntu ku pueblo.

Ku esaki nos ta rechasá un artíkulo ku a sali den Ultimo Noticia, ku MAN lo forma gobièrnu ku e partidonan den aktual koalishon. Pa asina mantené senor Jardim komo minister i sigui tuma medida kontra e pueblo. Partido MAN ta rechasá esaki kategórikamente.

Bisando esaki MAN ta rekonfirmá integridat di su Lider i ta ninga kategórikamente kualkier favoresimentu den nombrashon di ningun hende. MAN su lider komo mandatario semper a tuma desishon a base di konsehonan reglamentario di e peritonan di e aparato gubernamental.

Tambe MAN ta rechasá kategórikamente ku señora di nos Lider lo ta kobra un salario sin traha. Señora Koeiman ta un profeshonal apresiá ku ta akudí na trabou tur dia i ta ehersé su funshon ku profesionalismo i dedikashon na satisfakshon di ambos su superiornan i esnan ku e ta sirbi.

MAN ta konsiente ku e último dianan aki diferente atake a i lo sigui bin nos direkshon. Partido MAN lo sigui su trayekto manera semper, esta di no drenta diskushonnan ku no ta yuda e pueblo aki ku nada. Nos ta konsiente ku e ultimo dianan aki nos por spera mas di e atakenan infundá aki, pero nos lo no reakshoná.

Nos kompromiso ta ku pueblo i ku pueblo nos ta komuniká.

Durante último lunanan nos a bishitá barionan di Kòrsou ku mas frekuensha. Nos a bishitá kasnan, papia ku habitantenan, tende di habitantenen. Partido MAN su lider i kandidatonan, a puntra pueblo kiko ta nan preokupashonnan pa Kòrsou, pa nan barionan, pa nan famianan .

E desempleo grandi muy en espeshal bou di nos hubentut i e situashon sosial malu; nos enseñansa ku no ta duna hobennan oportunidat pa desaroyá nan talento; e kriminalidat ku ta azotá nos pueblo te den nan kas.

Nos a skucha bosnan preokupashon i ku bosnan sosten di voto, partido MAN lo ta den gobièrnu pa traha na bienestar di nos pueblo.

Nos ke pidi bo konfiansa pa huntu ku bo pueblo, partido MAN traha na lanta nivel di nos pueblo i nos komunidat.

Nos partido lo traha ku tur partido ku tin e mesun meta aki.

Bienestar di pueblo, un gobièrnu transparente, un gobièrnu sin korupshon.

Esei nos partido ta para pe.

Nos ke enfatisá un biaha mas ku partido MAN no tin ningun konvenio ku otro partido pa forma gobièrnu. Tampoko partido MAN no ta di akuerdo pa sigui tuma medida manera a tuma lugá último añanan.

Nos ke yama pueblo di Kòrsou danki pa e último lunanan ku nos lider i kandidatonan a bishitá bo i ku bo a habri bo kas pa risibí nan.

Masha danki.

Biba Kòrsou í su pueblo. Un voto pa MAN ta un voto pa Kòrsou.

Atentamente.

Hensley Koeiman,

Lider Polítiko di Partido MAN