KASONAN KU POLIS MESTER A ATENDE

Kasonan di Atrako

Djasabra 15 di òktober 2016
Den oranan di anochi tabata tin dos kaso di atrako ku a keda registrá.
Alrededor di 8.00 pm agentenan polisial a registrá un atrako ku a tuma lugá den area di Habaai. Malechornan a atraká un dama di edat i a kue su pertenensianan for di dje.

Alrededor di 8.40 pm tabata tin un otro kaso di atrako. E kaso di atrako aki a keda registrá den area di Sta. Maria.
Ambos kaso ta den investigashon.

Kaso di bringamentu ku detenshon

Den oranan di djasabra pa djadumingu mardugá sentral di polis a risibí yamada pa un kaso di bringamentu den area di Berg Altena.
Tabata trata di un kaso di bringamentu formal ku destrukshon.
Agentenan polisial mester a detené un dama pa motibu ku el a destruí bentana di un vehikulo ku tabata den serkanía.
Investigashon den e kaso aki ta kontinuá.