Delegashon ofisial di gobièrnu a bishitá Santiago di Cuba BONEIRU PREPARANDO PA ‘FESTIVAL DEL CARIBE’

Delegashon ofisial di gobièrnu a bishitá Santiago di Cuba

BONEIRU PREPARANDO PA ‘FESTIVAL DEL CARIBE’

KRALENDIJK – Durante e siman di 16 pa 23 di òktober un delegashon di Boneiru, enkabesá pa Diputado Nina den Heyer enkargá ku kultura, a bishitá Cuba ku e meta prinsipal pa hasi e preparashonnan nesesario pa partisipashon di Boneiru otro aña na ‘Festival den Caribe’. E festival aki ta asentuá e kultura afrokaribense na Santiago, siudat kubano. Algu partikular ta ku otro aña ta dediká e festival aki na Boneiru. E gobièrnu anterior e bai di akuerdo pa aseptá e dedikatorio aki i di mes for di awor mester kuminsá hasi e preparashonnan.
Durante e festival na yüli último, kaminda tambe un delegashon di gobièrnu a partisipá, gobièrnu a aseptá ofisialmente e ‘empaka’, ku ta enserá e kompromiso ofisial ku Boneiru ta e isla anfitrion durante e festival di 2017. Opviamente na e okashon ei no tabatin espasio pa papia tokante e preparashonnan pa e partisipashon di Boneiru otro aña na e festival kultural grandi aki.

OPORTUNIDAT
Pa Boneiru lógikamente esaki ta un oportunidat úniko pa kompartí i ekshibí su herensia kultural-históriko, kombiná ku e bunita naturalesa di e isla. Ta konosí ku Boneiru a hunga un ròl di pionero riba tereno di protekshon i konservashon di naturalesa.
Tur aña mas i mas hende ta bishitá e festival aki, ku otro aña ta bai selebrá su di 37 edishon. Den pasado a dediká e festival aki na diferente pais i isla di Caribe, entre kua tambe Kòrsou. Pa Boneiru ta un honor ku e festival ta dediká na e isla aki. Durante e festival, aparte di partisipante, un kantidat grandi di turista prosedente di rònt mundu ta bishitá e festival.
Otro oportunidat ku e festival ta brinda ta pa hisa nivel di artistanan boneriano. Cuba ta konosí pa e atenshon ku e ta duna di un forma profeshonal na kultura en general, ku énfasis riba disiplinanan di muzik, baile i teatro i arte plástiko, ku ta enserá entre otro pintamentu i eskultura. E ingredientenan aki tur i mas ta bin prominentemente dilanti durante e festival.

PREPARASHON
Ta opvio ku Boneiru, aseptando e dedikashon di e festival na e isla, a asumí un responsabilidat grandi. Un festival di e embergadura aki ta eksigí hopi preparashon. Entre otro ta tuma lugá diferente tayer durante e festival, tantu duná pa artistanan kubano na artistanan boneriano, pero tambe visevèrsa.
Mirando e magnitut i importansia di e festival pa Boneiru, gobièrnu a forma un delegashon pa bishitá Cuba pa sinta kombersá ku e diferente komishonnan ku ta organisá e festival. E organisadó di e festival ta ‘Casa del Caribe’. Mayoria di e reunionnan di e delegashon boneriano ku e organisadónan a tuma lugá tambe na ofisina di e instituto aki.
‘Casa del Caribe’ ta sumamente kontentu i impreshoná pa e echo ku Boneiru for di awor kaba a kuminsá hasi e preparashonnan nesesario. Durante e siman ku e delegashon boneriano a permanesé na Cuba e direktor di ‘Casa del Caribe’, Orlando Vergés Martinez, huntu ku su asistentenan, a hinka den otro un programa ku a hiba e delegashon na diferente sitio i instalashon na unda lo tin presentashon durante e festival di otro aña. A papia ademas ku instansianan ku ta relevante durante e festival.

‘CASA DE BONAIRE’
Kada komishon di ‘Casa del Caribe’ a haña oportunidat pa interkambiá informashon i ademas yega na palabrashonnan konkreto ku e delegashon boneriano. Un di e momentunan importante tabata e bishitá ku e delegashon boneriano a realisá na un kas monumental ku ta bai bira ‘Casa de Bonaire’ durante e festival di otro aña. Esaki ta enserá ku Boneiru ta bai instalá su sede den e edifisio aki, na unda lo bai tuma lugá tambe diferente aktividat.
E entusiasmo ta grandi di ámbos banda, esta tantu di parti ‘Casa del Caribe’ komo Gobièrnu di Boneiru. Den transkurso di e dianan benidero lo bai sigui mas informashon riba e tópiko aki.

????????????????????????????????????
????????????????????????????????????
????????????????????????????????????
????????????????????????????????????
Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: