Deklarashon di Promé Minister riba e último desaroyonan entre Kòrsou i Hulanda

Deklarashon di Promé Minister riba e último desaroyonan entre Kòrsou i Hulanda

Geplaatst op 13 November 2020 dor di Ministerio Asuntunan General i Promé Minister

Pueblo di Kòrsou,

Danki pa pèrmití mi kumpli, un biaha mas, ku e promesa pa tene boso informá di e desaroyonan rònt di nos rekuperashon sosial, finansiero i ekonómiko. Siman pasá nos a firma e akuerdo ku Hulanda pa e pakete di pais, esta e landspakket. Mi tabatin e honor pa, huntu ku mi kolega Minister Martina, firma e akuerdo akí ku Sekretario di Estado sr. Knops. Esaki tabata kulminashon di un trayekto ku huntu, inkluso boso tur ku  indulgensia i konfiansa, nos a kana pa por a yega asina leu. Danki na e trabou duru di empleadonan públiko i ekspertonan, determinashon di Konseho di Minister i sosten di Parlamento a traves di un moshon, nos a logra dal e paso importante akí!

Ta bon pa informá un i tur, ku riba e mesun fecha ku a firma e akuerdo akí, Kòrsou tabata disponé di e di tres transh ku ta un fiansa di 105 mion florin riba nos kuenta na banko Sentral. Esaki ta nifiká por ehèmpel ku fin di luna di novèmber awor, nos por kumpli ku nos debernan manera pago di salario, kreditornan, pago di sosten na empresanan pa paga salario i kompensashon pa kuminda na esnan ku mas tin mester den nos komunidat. Na mes momentu Hulanda a komprometé su mes pa aserka duna un donashon di 150 mion florin. Esei ta konsistí di un donashon di 60 mion florin pa invertí den edifisionan i infrastruktura di enseñansa, ayudo pa stimulá desaroyo empresarial i reformá tantu nos klima di invershon komo merkado di kapital (ku instrumentonan di garantia), pa kual a reservá 40 mion florin pa start.

Ademas di esei, Hulanda a reservá un montante adishonal di 50 mion florin pa transformá i reforsá nos estado di derecho manera por ehèmpel Wardakosta, Duana i formashon di nos hóbennan pa medio di e asina yamá ‘vormingsplicht’.

Aparte di e parti finansiero, mi tin sigur ku pueblo di Kòrsou ke sa mas tokante e diferensha entre e órgano di reforma CHE ku inisialmente a keda proponé pa Hulanda, i e órgano di reforma i desaroyo, esta COHO, ku ámbos pais finalmente a akordá. P’esei Gobièrnu den e próksimo dianan lo duna splikashon mas amplio di esaki na pueblo tokante kiko e kambionan ta. Ta bon pa sa, ku hopi punto a keda aklará tambe den e nota di memoria ku ta kompañá e lei. Banda di esaki nos a inkluí un lista di pregunta pa keda kontestá pa Raad van State. Keda pendiente pa mas informashon tokante esakinan.

Mientrastantu mi por informá boso ku den e mesun siman trabounan a kuminsá huntu ku vários ministerio i e delegashon di Hulanda, ku a keda Kòrsou te ku djabièrnè último. Esaki pa den e simannan benidero por yega na e plannan di aserkamentu (plannen van aanpak) i plan di ehekushon (uitvoeringsplan). For di un inisio mi a indiká ku esaki ta algu ku huntu, nos mes i nos ekspertonan den koperashon ku Hulanda, mester traha. Mas lihé nos keda kla ku esakinan, mas lihé nos por kuminsá realisá e reformanan i haña e sosten finansiero i tékniko nesesario, pa realisá kambionan struktural na bienestar di nos desaroyo. Tin fechanan definitivo kla definí pa logra pasonan konkreto i midi esakinan tambe.

Alabes nos mester sòru pa nos kumpli ku e kondishonnan ku nos a aseptá pa por a risibí e siguiente transh di sosten den 2021. Komo tal mester sigui kumpli ku palabrashonnan hasí i realisá avansenan manera palabrá i ku boso ta deseá.

Ami i mi gabinete lo sigui komprometé i traha duru pa ku e kousa di nos pueblo. Ta pa e motibu akí tambe mi a probechá di mi estadia na Hulanda pa tene un enkuentro ku Rei Willem Alexander i tambe hiba kombersashon ku Promé Minister di Hulanda, sr. Rutte (tokante e situashon di Covid-19) i Minister di Finansa di Hulanda, sr. Hoekstra, pa atendé TUR loke mi tabatin riba agènda, den e dianan ku mi tabata einan.

Mi no ta kansa di enfatisá ku mi ta konvensí ku e kaminda ku nos ta kanando ta esun korekto. Nos mester hasi todo por todo pa nos drenta un Etapa Nobo, ku ta brinda nos e oportunidat pa prosperá i duna esnan ménos privilegiá den nos komunidat un mihó perspektiva. Nos mester lanta kabes, tin kurashi, karga nos responsabilidat i dal e pasonan nesesario ku firmesa. Nos a proba di por atendé na un forma madurá ku nos retonan te ku awor i mi ta konta ku boso sosten pa keda hasi esei. Laga nos sigui padilanti, dunando espasio pa nos krea awor e diferente plannan di aserkamentu i plan di ehekushon. Lo mi mantené boso informá kada dos siman.

Un felis wikènt i Dios bendishoná boso tur.

This site uses Akismet to reduce spam. Learn how your comment data is processed.

error: Content is protected !!
%d bloggers like this: