Denrick R. Rombley ta gradua! Promé yu di Kòrsou ku a gradua na Madrid, Spaña, komo meteorólogo segun eksigensianan nobo i mas elevá di ICAO i WMO

Denrick R. Rombley ta gradua!
Promé yu di Kòrsou ku a gradua na Madrid, Spaña, komo meteorólogo segun eksigensianan nobo i mas elevá di ICAO i WMO

Willemstad- Djabièrnè, dia 28 di òktober último, e profeshonal hóben yu di Kòrsou, Denrick R. Rombley, a gradua na Madrid komo meteorólogo. Señor Rombley a risibí su diploma for di e Presidente di e Agensia Estatal di Meteorologia di Spaña (AEMeT), Don Miguel Ángel López. Señor Rombley ta un di e promé meteorólogonan den e region di Iberoamérica (Sentroamérika i Latinoamérika) ku ta kumpli ku e eksigensianan nobo i mas pisá di e International Civil Aviation Organization (ICAO) i di World Meteorological Organization (WMO). E eksigensianan aki lo drenta na vigor dia promé di desèmber di 2016.

Na 2014, Servisio Meteorológiko Kòrsou a bira miembro asosiá di e Konferensha di Direktornan di Meteorologia i Hidrología di Iberoamérika, konosí komo CIMHET. Esaki a krea e posibilidat pa profeshonalnan di Kòrsou sigui e kursonan ku CIMHET ta brinda.

Dureante di e promé lunanan e kursistanan tabata sigui e kursonan ‘online’, i nan mester a dominá un total di 110 diferente materia repartí entre: meteorologia físika, meteorologia dinámika, meteorologia sinóptika i mesoeskalar, i klimatología. Pa e dos último lunanan di e kurso, Señor Rombley a biaha pa Madrid kaminda e la sigui kurso den e siguiente materianan: gerensia, retnan i sistemanan di opservashon, pronóstiko i klimatología.

Durante di e seremonia di graduashon e Presidente di AEMeT, Don Miguel Ángel López, a kòrda riba e esfuersonan ku mester a hasi pa asina logra ku e kurso por a bira un realidat. E la enfatisá e nesesidat di tur meteorólogo rònt mundu pa traha huntu manera un gran famia. Esaki ta e uniko forma ku por salba humanidat di katástrofenan natural.

E representante di WMO, ku ta tambe Hefe di e Departamentu di Formashon i di Beka na Ginebra, Dr. Yinka Adebayo, a urgí e grupo di meteorólogan nobo pa sigui desaroyá nan mes komo profeshonal. E la enfatisá ku nan graduashon komo meteorólogo no ta e final di e kaminda, sino e komienso di nan kapasitashon kontinuo na bienestar di nan pais.

Na Madrid, huntu ku Denrick Rombley, kursistanan di e siguiente paisnan a risibí nan diploma: Bolivia, Chile, Colombia, Ecuador, Nicaragua, Panamá, Repúblika Dominikana, El Salbador, i Venezuela.

Señora drs. Ann Groot-Philipps, Direktora di Kas di Kòrsou i tambe Representante di Gobièrnu di Kòrsou pa Union Europeo na Bruselas a representá e Direktor di Meteo Kòrsou, Dr. Albert Martis. E la hiba palabra durante di e seremonia di graduashon na Madrid. Señora Groot-Philipps a gradisí Gobièrnu di Spaña i WMO pa e fondo nan ku a finansiá e kurso aki kompletamente. Ademas e por a tende di e instruktornan di Señor Rombley ku e tabata un estudiante ehemplar.

Minister Camelia-Romer, bou di ken Servisio Meteorológiko Kòrsou ta resortá, ta felisitá Sr. Rombley ku e gran logro aki.