ENTRANTE 1 DI NOVÈMBER NO POR PAGA KÈSH MAS NA AEROPUERTO

ENTRANTE 1 DI NOVÈMBER NO POR PAGA KÈSH MAS NA AEROPUERTO

Willemstad – Entrante 1 di novèmber Duana di Kòrsou ta hiba un maneho nobo di pago na Aeropuerto. Biaheronan por paga impuesto riba importashon ku karchi di banko, credit card, na banko òf online so. Ku otro palabra no por paga kèsh ni ku chèk mas ora drenta Kòrsou ku produkto ku ta surpasá e kantidat, peso, balor òf porsentahe aplikabel pa lei. Lo tin un periodo di transishon te ku 31 di desèmber próksimo. Pa informá komunidat i biaheronan Duana a traha un foyeto na 4 idioma, Hulandes, Spañó, Hulandes i Papiamentu. E informashonnan aki ta importante pa biaheronan tene kuenta kuné ora nan yega Kòrsou ya nan por skohe e kanal korekto, esta Kanal Bèrdè ora no tin nada di deklará òf Kanal Kòrá si tin algu pa deklará.

Produktonan di tabako, bibida alkohóliko stèrki, perfume i Eau De Toilette, kòfi i te ta haña eksonerashon pa drenta Kòrsou pero ta mará na sierto kantidat, peso i balor. Esaki ta konta tambe pa tur otro produkto ku optené òf kumpra den eksterior òf na ‘Duty Free” te na un balor di NAF. 200,00 pa personanan di 15 aña òf mas. Pa personanan bou di 15 aña e montante ta NAF. 65,00. Tur produkto personal òf produkto di karakter komersial optené den eksterior ku ta surpasá NAF. 200,- na balor mester deklará i paga impuesto. Sèn transportá pa un persona òf un grupo ku ta biaha huntu ku surpasá e balor di NAF. 20.000 mester deklará esaki.

E foyeto ta disponibel na yegada di Aeropuerto, via agensianan di biaha i Konsuladonan na Kòrsou. Por tuma nota tambe di e foyeto riba website di Duana i CTB. Den e foyeto Duana ta elaborá mas riba detaye di e produktonan ku ta haña eksonerashon pa pago di impuesto, loke mester di pèrmit, no por importá i otro aspektonan importante relashoná ku produktonan ku ke drenta Kòrsou kuné. Pa mas informashon tokante importashon por bishitá e website http://www.douane.cw
duane-gobiernu

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: