It’s now or never!

It’s now or never!

Un bon amigu di mi “Cor” durante nos kombersashon tokante e situashon preokupante di Kòrsou ku su enorme desempleo bou di hubentut, e tendensia fuerte di subida di krímen, nos ekonomia mankaron pa vários aña, oumento di e tendensia di shushedat i sirkunstansianan a-higiéniko den sierto barionan i na sitionan públiko, a drei bisa: ‘It’s now or never’ pa kambia nos situashon. Ku esaki indikando ku nos mes ta na un balente edat kaba i ademas ku e situashon ta realmente preokupante den e sentido ku awor sí e momento di nesesidat pa trese kambio ta agudo! No por ta ku polítiko i partidonan polítiko den porta di elekshon ta señalá ku mester hasi tur posibel pa drecha nos enseñansa, hasi algu serio pa mehorá nos agrikultura, fortifiká e base pa koperativismo na Kòrsou, duna gobernashon un kara mas sosial, anto ya na momento ku nan ta na poder ta hasi manera nan a lubidá. Kiko ke men 30.000 suidadano ku no a bai vota, ku di e forma ei a demostrá klaramente di no tin e motivashon ni konfiansa pa bai tras di esnan ku a presentá nan mes pa goberná e pais aki? Pero, no ta simplemente kuestion di blablabla, ku palabra i of ekspreshonnan bunita manera ‘smart nation’, ‘Zero-tolerance’, ‘One windowservice’, ‘Green-attitude’ nos ta kambia e pais aki. Pa kuminsá ningun proseso di kambio no ta posibel si tur esfuerso i of ingrediente di e kambionan ta pasa bai plenamente riba kabes di e masa grandi di e komunidat aki. Un grupitu chikitu ta pretendé tur sorto di kos na bienestar di Kòrsou, siendo e gran mayoria di e komunidat ta pará totalmente na banda, manteniendo su mes ‘indiferente’ versus di tur loke ku subi mesa. E gobernante mester ta konsiente ku ta huntu ku e pueblo so por drecha kos, anto ta p’esei e hinkamentu di man den saku di suidadanonan di e pais aki riba un base unilateral, manera ministernan di finansa di turno a bin ta hasi segun kustumber, ta kompletamente robes. Komo pueblo nos a para bira únikamente manera un baka ‘lechera’! A yega e momento pa komprondé i aseptá definitivamente ku un minister di finansa no por ta eksitoso ku su akshonnan, siendo gran parti di e komunidat ta sufri, ta pasando malu, pasobra e ta konfrontá ku problemanan serio pa por kome i mantené su mes na bida, ta biba por ehèmpel den un kas kaminda konekshon di awa i koriente ta deskonektá. Gobernashon mester tuma lugá a base di sierto prinsipionan, esta pa duna tur suidadano di Kòrsou un ‘faire chance’ di por forma i eduká su mes debidamente, biba por lo ménos ku e mínimo na entrada ku ta garantisá un bida stabil i di un nivel aseptabel, formando parti di un medioambiente ku ta keda respetá i kuidá pa generashonnan siguiente. Kòrsou su gobernante i demas dirigentenan mester aspirá pa hasi di nos komunidat, un pais desaroyá durante un ékis periodo proyektá adelantá. Kontrali na esaki, un pais ku kaso di krímennan horendo haltu den forma di likidashon kruel, atrako, pobresa i hopi sufrimentu, no ta e tipo di pais ku nos mester pèrmití! Ta momento ku gobernashon ta kuminsá hasi uzo di métodonan ku a proba nan mes den mundu i ku a sirbi den esfuersonan pa pueblonan avansá i progresá. Gobernashon no por ta basá riba gèmbelmentu ku ideanan loko, pero no realista, ni tampoko riba teorianan finansiero bieu i ku anos tras di otro a frakasá kaba.

Erwin Raphaëla.