PA MOTIBU DI UN NESHI GRANDI DI ABEHA: TA KITA E PALU KU A KAI NA ZUIKEETUINTJE MAÑAN MAINTA TREMPAN

​Pa motibu di un nèshi grandi di abeha: Ta kita palu ku a kai na zuikertuintje mañan mainta trempan.
Willemstad – Servisio pa Obra Públiko ta informá komunidat ku tin un palu ku a kai na entrada di Zuikertuintje Mall na Zuikertuintje. Esaki a sosodé pa motibu di mal tempu. Ta trahando pa move e palu mas pronto ku ta posibel, pero durante di e trabounan a bin tuma nota ku tin un nèshi grandi di abeha den e palu. A yama un eksperto ku ta atendé ku abeha i el a konsehá pa evitá di kita e palu, i konsekuentemente e nèshi, aworakí. Esaki ta pa evitá ku e abehanan ta bira razu i ‘ataka’ hende den e besindario.
Mirando e situashon ku ta presentá a konsekuensia di e palu, Servisio pa Obra Públiko huntu ku Polis di Tráfiko ta desviá tráfiko. Por pasa riba e tereno di Zuikertuintje Mall pa drenta i sali for di e area. Mañan mainta trempan lo kita e palu i tambe e nèshi di abeha. Pues pa mayan e situashon ta normalisá. 
Aqualectra na su turno ta trahando pa restablesé koriente den e besindario.