Advertisements

DOS SUIDADANO A RISIBI CHAPI DI LUCHA

DOS SUIDADANO A RISIBI CHAPI DI LUCHA

Kralendijk – Djaweps 10 di novèmber a tuma lugá na Skal entrega di Chapi di Lucha na dos suidadano. E aktividat tabata organisá pa Skal Sekshon Kultura Arte i Literatura na nòmber di Gobièrnu di Boneiru. Tabata diputado Rolanda Hellburg Makaai ku a hasi entrega di e Chapi di Lucha nan. Aki ta sigui e historia di nos dos suidadano ku a risibí e Chapi di Lucha.

Durante diskurso di di duputado Rolanda Hellburg Makaai ela aksentuá, ku kada unu ku ta kere den Boneiru pa kada unu dobla manga di kamisa i traha ku sodó di nos frenta pa e Chapi di Lucha por sigui plug e tera di adelanto prosperidat i desaroyo positivo pa nos isla por sigui bai dilanti. Tabata un anochi ameno i tur esnan ku tabata presente a disfrutá engrade huntu ku nos dos suidadano ku a risibí nan Chapi di Lucha.

Aki ta sigui un kompilashon di e lokenan e dos suidadano aki a hasi ku awe nan por ta orguyoso di a risibí e Chapi di Lucha.

Thelma Nicodemus de Palm- Scherptong a nase na Boneiru dia 15 sèptèmber 1928.

Thelma for di edat hóben a kuminsá ekspresá su pashon pa nos kultura prinsipalmente riba tereno artístiko teatral.

Ku su 18 aña el a aktua den un grupo di komedia i tabata for di e momentu ei ku Thelma a kuminsá skirbi tambe tekstonan pa komedia i skèch.

Na aña 1979 Thelma a lanta su propio grupo di komedia bou di e nòmber Grupo Kamari. E grupo aki a duna un gran kantidat di presentashon no solamente aki na Boneiru sino tambe na vários okashon na Kòrsou i Aruba. Un di e obranan teatral skirbí pa Thelma ku sigur a kosechá bastante éksito e tempu ei tabata Bida di Ántes i Awor.

Mester menshoná ku loke Thelma ta dominá hopi bon tambe e arte kulinario. Primeramente Thelma a siña kushiná serka su mama i despues sigui desaroyá su mes den un forma mas profeshonal. Entre otro el a sigui kursonan i tèrminá esakinan ku éksito serka Tonton Mercera (q.e.p.d.).

Riba petishon Thelma regularmente sa kushiná na okashon di fiestanan di kumpleaño, risibimentu, kasamentu etc. Thelma no solamente ta kushiná pero tambe ta hasi henter e presentashon di e kumindanan den forma dekorativo.
Tambe Thelma ta traha i dekorá bolo, entre kual bolo di batrei.

Obra di man ta otro di e áreanan artístiko ku Thelma ta kampion den dje. Lokual sin duda Thelma a bira hopi konosí p’e, ta kurtimentu di kueru i trahamentu di obranan ku esakinan. Obranan ku e ta krea di kueru ta entre otro pòtmòni, slòf, faha, sombré, mochila, asina por sigui menshoná.

Thelma ta un di e pioneronan pa loke ta trata gruponan di 60+ aki na Boneiru. Bou di su presidensia riba 16 di yanüari 1989 a inisiá ku e promé grupo di 60+ di Boneiru, esaki den e bario Nikiboko.

Thelma tin tambe basta aña ta kanta riba kor na Misa di Playa.

Thelma tambe a forma parti di e organisashon sosial deportivo ku yama Gold Finch, den inisio komo tim di kòrfbal i despues tambe grupo di komedia i klup di dama, den e último aki ainda Thelma ta aktivo.

Thelma ta tambe kosturera, kosiendo entre otro trahenan folklóriko ku diseñonan propio.

Thelma su mensahe na tur boneriano ta; No Laga Nos Kultura Kaba.

Pa rasonnan menshoná, na okashon di konmemorashon di Lantamentu di Katibu 1834 bou di guia di Martis di Katalina Janga, Gobièrnu di Boneiru atraves di Sekshon Kultura Arte Literatura ‘SKAL’ ta kondekorá Thelma Nicodemus de Palm- Scherptong ku Chapi di Lucha 2016.

Franklyn Ponciano Piekeur a nase na Kòrsou dia 19 di novèmber 1953.

Na aña 1974 Franklyn a bin biba Boneiru pa traha riba konstrukshon di e terminal di e kompania petrolero BOPEC.

Na aña 1976 trahadónan di BOPEC ta afiliá na e sindikato AFBW pero tres aña despues ta disidí pa lanta nan propio sindikato bou di e nòmber Bonaire Petroleum Workers Union (BPWU).

Tabata e momentu ei ku Franklyn a hasi su entrada den e mundu sindikal, formando parti di e promé direktiva di BPWU komo tesorero. Pa un periodo di binti aña Franklyn a keda aktivo den e sindikato, durante kual el a akapará bastante eksperensia.

Despues di tempu Franklyn a skohe pa drenta polítika kual a kondusí ku pa 5 aña el a sirbi pueblo di Boneiru komo miembro di Konseho Insular. Den polítika i komo miembro di Franklyn a sa di hasi bon uso di su eksperensianan riba tereno sindikal.

Komo boluntario tambe Franklyn a duna su aporte na komunidat boneriano.

Entre otro el forma parti di e organisashon ku tabata enkargá ku sertámen di Miss Teenager.

Tambe Franklyn pa algun tempu a forma parti di direktiva di Sentro di Bario Antriol, den e kaso aki komo presidente.

Den farándula tambe Franklyn a move, entre otro komo dirigente/ road manager di banda musikal, organisadó i kordinadó di eventonan manera fiesta, show etc.

Despues di a laborá pa aña komo empleado públiko den e departamentu di Domein Beheer, aktualmente Franlyn ta gosando di su pinshon.

Pa rasonnan menshoná, na okashon di konmemorashon di Lantamentu di Katibu 1834 bou di guia di Martis di Katalina Janga, Gobièrnu di Boneiru atraves di Sekshon Kultura Arte Literatura ‘SKAL’ ta kondekorá Franklyn Ponciano Piekeur ku Chapi di Lucha 2016.

foto-t-de-palm-f-piekeur-dip-r-helburg-makaai-t-silberie

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: