Gobiernu ta deliberá ku Insel Air tokante situashon di cash flow

Gobiernu ta deliberá ku Insel Air tokante situashon di cash flow

Kompania di aviashon Insel Air a aserká gobiernu ku e petishon pa deliberá tokante posibilidatnan pa solushon di e situashon preokupante di cash flow pa e kompania aki. Insel Air a duna di konosé ku e situashon aki ta konsekuensia di no por risibí pago di un debe di aproksimadamente US$ 100 miyon di pais bisiña Venezuela. Prolongashon di e situashon aki no ta deseabel i ta tacha e maneho diario di Insel Air. 

Insel Air ta e provehedor mas importante di konekshon aereo pa i for di Kòrsou. Pa gobiernu, un bon konekshon aereo pa destinashonnan importante, ta balioso. Alabes ta balioso pa un bon suministro di servisio ku por ofresé transporte aereo amplio.  
Un konekshon aereo defisiente por tin konsekuensianan desastroso pa nos ekonomia i pa e motibu aki mester keda evitá mas tantu posibel.

Pa por a entamá e kombersashon ku Insel Air, Konseho di Minister a forma un Komishon di Sabionan, bou di guia di sr. Etienne Ys. E otro miembronan di e Komishon ta eksperto riba e tereno di aviashon i accountancy.
E Komishon lo investigá estado ekonomiko di e kompania mas profundo huntu ku Insel Air i lo deliberá tokante posibel solushonnan. Insel Air a primintí di lo duna su koperashon kompletu pa ku esaki.  

E komishon ta raportá na un stuurgroep di Konseho di Minister ku ta konsistí di Minister di VVRP (Verkeer, Vervoer en Ruimtelijke Planning), sra. Suzy Römer, Minister di Finansa, sr. José Jardim i Minister di Desaroyo Ekonomiko, sr. Eugène Rhuggenaath. 
E Komishon ta saka un relato denter di tres siman di su konklushonnan i konsehonan.
A base di esaki gobiernu lo palabrá pasonan ku mester keda tumá huntu ku Insel Air.