Korps politie Aruba: Visibility Team Oranjestad ta traha prevrntivo y represivo.

​Visibility Team Oranjestad ta traha preventivo y represivo

Ta percura pa mas siguridad den centro di ciudad
Polisnan trahando na Visibility Team Oranjestad ta drentando e periodo di aña mas druk pa e centro di Oranjestad. Cu cuminsamento di e “cruise ship season”, e temporada halto di bishita di barconan crucero, tin dianan cu entre 3000 pa 5000, te hasta 9000 usuario adicional (turista y tripulacion) concentra den e area y ta rekeri hopi accionnan di patruya preventivo na pia, den auto y riba bicicleta.
Regularmente e team ta haya nan mes cu accionnan relaciona na e presencia di “landlopers” y/of “adictonan ambulante” cu ta molestia turistanan y otro personanan cu ta haci uzo di e servicionan den centro di Oranjestad. Resumiendo e siman di dia 7 pa dia 13 di november, esaki un biaha mas ta un di puntonan cu ta resalta.
Entre otro tambe e team ta vigila pa personanan cu ta pasa den cayanan den direccion opuesto, “verboden”, pa cual dialuna, dia 7 di november, a duna tres proces-verbaal na chauffeurnan cu a ignora e borchinan di indicacion di ‘verboden’. Den transcurso di e dia a topa cu “Lloyd”, conoci di Polis pa “landloperij” den bisindario di e parada di bus grandi y tambe mester a atende cu e adicto “John”, kende tabata molestiando turistanan banda di Eetcafe Paddock. Ambos Polis a core cu nan for di e area.
Dia 8 di november tabata na Aruba e barconan “Serenade of the Seas” y “Brittania” cu mas of menos 7400 turista. Visibility Team a mantene ordo den e area di e entrada/salida principal di waf y na waf chikito. Atrobe, mainta net despues di 10’or, mescos cu e dia anterior, atrobe adicto “John” mester a wordo saca for di e area cu un patruya. Den e caso aki tabata un chauffeur di taxi cu a duna polis un tip cu e adicto tabata molestiando turistanan banda di Renaissance Resort.
Diaranson Royal Princess a mara na Aruba cu mas of menos 4000 turista. Patruya a sigui den e zona ya conoci; banda di ex oficina di Duana, Polisnan atento a para y duna boet na cinco chauffeur pa coremento sin faha di siguridad y falta di cumplimento cu belasting, esta pago di number di auto. Ademas Visibility Team tambe a interveni den caso di un persona cu a wordo kita for di trabao na Renaissance kende a presenta na e luga pa haci desordo. Security Guard a acerca Polis y a laga sa cu e persona a bisa cu e tin un arma. Polisnan a bin topa cu e señora despues, a papia cun’e tocante di su comportacion y a conseh’e cu si e ta haya cu a kit’e for di e trabao sin motibo valido pa e acerca Departamento di Labor.
E barco crucero Zuiderdam tabata den waf diasabra cu 2500 turista, pa cual motibo Polisnan a patruya regularmente. Banda di Zara a duna un chauffeur boet pa core den “verboden” y banda di Ladies Choice a duna un persona boet pa core sin faha di siguridad. Tabatin diferente caso mas den dia unda cu a duna proces-verbaal pa coremento sin helm, coremento den “verboden” y coremento sin faha di siguridad. “Landloper R.F.” a actua fresco cu polis riba bicicleta ora cu a acerk’e, polis a papia cune tocante di su forma di expresa su mes y a sak’e for di e area.