ENNIA ta publiká un manual na diferente idioma ku tep kon prevení Zika.
ENNIA ta publiká un manual na diferente idioma ku tep kon prevení Zika.
E siman akí ENNIA ta publiká un manual ku informashon kla i aktual tokante e vírùs di Zika i ku gran kantidat di informashon kumbiniente kon prevení. Por baha e manual kolorido i fásil pa lesa na tres idioma for di ENNIA su website i por hañ’é grátis na e ofisinanan di ENNIA riba tur e islanan, tanten ku tin na stòk.
Gilbert Martina, Senior Managing Director di ENNIA ta bisa: “Komo kompania di seguro, ya ta un kantidat di aña ku nos a amplia nos servisio ku konseho di prevenshon, dunando komunidat informashon di forma struktural. Ademas di nos konferenshanan grátis di PreventNow ku tur aña atrobe ta hala sentenar di partisipante, nos ta presente tambe riba medionan sosial ku tur tipo di tep pa prevenshon.”
Regularmente ENNIA ta publiká manual i foyeto tokante prevenshon pa informá komunidat kon aktua den kualke kaso di kalamidat, daño òf peliger. Ademas di e manual di Orkan kual ta popular, awor ENNIA ta bai saka e manual pa prevenshon di Zika pa tur habitante di Karibe Hulandes na Ingles, Hulandes, Papiamento i Papiamentu.
Según Gilbert Martina: “Den Karibe tambe e vírùs di Zika ta aktivo, i serka hende muhé na estado e por kousa daño serio na e yu ku ta bai nase. Nos manual ta trata e kousanan i e diferente síntoma i konsekuenshanan di e vírùs di Zika rònt mundu, ku énfasis riba Karibe Hulandes. Komo ainda no a desaroyá un vakuna efektivo, por lo pronto ta prevenshon lo keda e mihó kura. Ta pa e motibu ei e manual pa prevenshon di Zika ta kontené un kantidat grandi di sugerensha práktiko. A base di esei tur siudadano por hasi areglo preventivo den i rònt di nan kas pa prevení ku nan famia ta haña Zika.”
Por haña e manual di Zika grátis na ENNIA òf por download e for di ennia.com/zika.
Pronto ENNIA lo pone un pakete di lès tokante Zika disponibel pa skolnan. E pakete ku material instruktivo modèrno i aktual ta intenshoná pa e promé gruponan di Enseñansa di Fundeshi. E pakete di lès aki tambe lo ta disponibel riba ennia.com/zika.
