Polis Hulandes ta buska e tip di oro pa solushona e asesinato di Rosleny Magdalena

Update kaso di asesinato di e dama Rosleny Magdalena

E dama di 28 aña Rosleny Magdalena a keda asesiná djaweps 17 di novèmber den oranan di mainta na Maldenhof.

Deskripshon di e kaso

E viktima a bai baha su yu muhé di 6 aña na skol, alrededor di 8or di mainta riba baiskel.
El a kore for di nan kas na Leerdamhof pa bai Holendrechtplein, kaminda e skol ta situá. Alrededor di 8.15 el a kore bai bèk direkshon di kas via di Maldenhof. Aki ta kaminda ku un persona ta enkontrá ku e viktima grave heridá riba un brug ku ta konektá ku Gaasperdammerpad. Ta resultá ku el a keda alkansá pa varios tiru i apesar di esfuersonan pa reanim’é e ta fayesé na e sitio mes.  Ainda no tin klaridat riba lokual eksaktamente a tuma lugá i tim di reshèrshi ta hasi un yamada na posibel testigunan. E tim tin e siguiente preguntanan:

Tin persona ku por a mira algu partikular na Lotusschool na momentu ku Rosleny a baha su yu i kore bai riba su baiskel den direkshon di Maldenhof? 
Ken por a mira algu partikular den bisendario di Leerdamhof, Maldenhof, Gaasperdammerpad i Reigersbospad?
E tim di reshèrshi ku urgensia ta en buska di informashon tokante prinsipalmente e bida privá di  Rosleny Magdalena. Ken por tin informashon tokante esaki?

Si bo por tin informashon relashoná ku e kaso aki, bo por yama Opsporingstiplijn: 0800-6070. 
Si bo ke keda anonimo, bo por yama Meld Misdaad Anoniem: 0800-7000 òf yena e formulario riba www.meldmisdaadanoniem.nl