Petishon pa 3 reunion públiko di parti frakshon di MFK

Na: Presidente di Parlamento
sr. H. Davelaar
Wilhelminaplein 4
Presente

Willemstad, 30 di novèmber 2016

Tópiko: Fondonan di AOV/AWW ku ketu bai ta wòrdu manehá ku un défisit, miéntras ku durante di e último 4 añanan ku a transkurí a tuma diferente medida ku mester a trese stabilidat den e fondonan aki, i esaki no a solushoná.

Apresiabel sr. Presidente,

Suskritonan, miembronan di frakshon di MFK, pa medio di esaki ta entrega e petishon aki na presidente di Staten pa yama un reunion públiko di parlamento pa trata e punto di agènda ariba menshoná konforme artíkulo 64 di Reglamento di Órden.

Durante di tratamentu di presupuesto di Kòrsou pa aña 2017, frakshon di MFK por a tuma nota ku e fondonan di AOV/AWW ta wòrdu manehá ku un défisit, esaki a sorprendé nos frakshon debí ku durante di e último añanan a tuma diferente medidanan ku mester a fortifiká i stabilisá e fondonan aki, segun Gobièrno.

Nos sa ku pa negligensia di gobièrnunan di turno durante di e último 23 añanan ku a transkurí e fondonan di AOV/AWW a bin kai den un défisit i ku un di e medidanan ku mester a yuda pa saka e fondonan aki for di e zona kora ta oumentu di edat di penshun di 60 pa 65 aña, apesar di e kambio aki ainda e fondonan no a stabilisá i sali for di e zona di peliger,

Presensia di minister di salubridat kual ta e minister enkargá ku SVB ku ta e entidat ku ta manehá e fondonan aki ta nesesario i tambe Minister di SOAW ku ta responsabel di e maneho di AOV/AWW na e reunion aki pa asina miembronan di parlamento por debatí ku e ministernan riba e tópiko aki. Nos ta pidi presidente di parlamento pa ekstendé un invitashon na e 2 ministernan konserní.
oproep-openbaar-fondonan-di-aov-aww

==============

Na: Presidente di Parlamento
sr. H. Davelaar
Wilhelminaplein 4
Presente

Willemstad, 30 di novèmber 2016

Tópiko: Maneho di awa di Yobe, Damnan i Roi nan ku ta keda den e diferente áreanan di Kòrsou pero partikularmente den e área di Banda Abou.

Apresiabel sr. Presidente,

Suskritonan, miembronan di frakshon di MFK, pa medio di esaki ta entrega e petishon aki na presidente di Staten pa yama un reunion públiko di parlamento pa trata e punto di agènda ariba menshoná konforme artíkulo 64 di nos Reglamento di Órden.

Durante di e último añanan kada bes ku awa kai, gran parti di Kòrsou ta bou di awa i kamindanan ta wòrdu inundá i ta pone ku e fluho di tráfiko ta wòrdu opstruí i peatonnan no por hasi uso di nos kayanan públiko i pa no papia mes di inkunbiniensianan ku abitantenan di e area di Banda Abou ta eksperensia kada bes ku tin un yobida fuerte, a indusi nos frakshon pa hasi uso di artíkulo 64 di reglamento di òrdu pa pidi un reunion públiko ku e tema ariba menshoná.

Nos frakshon ta kere ku ta importante pa yama un reunion públiko pa trata e tema aki, debí ku na mas ku un okashon nos a skucha minister di VVRP indiká ku tur aña promé ku temporada di áwaseru i orkan ta laga limpia e diferente roinan i hasi sierto trabounan di mantenshon na nos damnan.

Pero kada bes di nobo pueblo di Kòrsou ta eksperensia difikultat den temporada di áwaseru, nos frakshon ta sumamente preokupá ku esaki, debí ku si un tiki áwaseru ta okashoná asina tantu difikultat na Kòrsou esei ta nifiká ku nos no ta prepará pa kualkier otro manifestashon di naturalesa ku lo ta mas fuerte ku áwaseru.

Presensia di minister enkargá ku e ministerio di VVRP lo ta nesesario pa e motibu aki nos ta pidi presidente di parlamento pa ekstendé un invitashon na e minister konserní.

Atentamente,

oproep-openbaar-maneho-awa-di-yobe-damnan-i-roi
=====================

Na: Presidente di Parlamento
sr. H. Davelaar
Wilhelminaplein 4
Presente

Willemstad, 30 di novèmber 2016

Tópiko: Relashon di e diferente ministerionan i/òf otro entidatnan di gobièrnu ku tin un relashon di trabou i ta hasi pagonan na Fundashon pa Deporte i Rekreo Sosial (FDRS)

Apresiabel sr. Presidente,

Suskritonan, miembronan di frakshon di MFK, pa medio di esaki ta entrega e petishon aki na presidente di Staten pa yama un reunion públiko di parlamento pa trata e punto di agènda ariba menshoná Petishon pa un reunion públiko konforme artíkulo 64 di Reglamento di Órden.

Durante di presupuesto di Kòrsou pa aña 2017, frakshon di MFK por a tuma nota ku gobièrnu a presupuestá òf tin un relashon di trabou ku fundashon FDRS ku nos tur sa su historia i ku sigur no ta kumpliendo ku e meta konforme su statutonan pa kual a otorgá un supsidio na e fundashon aki den 24 ora den pasado.

Nos enseñansa ta pasando den momentunan sumamente difísil, kaminda direktivanan di skolnan, universidatnan i Feffyk ta bati na porta di gobièrnu pa oumentu di supsidio pa nan por mantené nan operashon i elevá e nivel di enseñansa, pero nos ta konstatá ku ta ninga i hasta kòrta den presupuesto di e entidatnan aki ku ta responsabel pa enseñansa. Miéntras ku pa FDRS si ku no tin ningun ekspertisio den enseñansa a reserva miónes riba presupuesto pa nan.

Den prensa hasta nos por a tuma nota ku MDPT (enkargá ku Refineria) na mas ku un okashon a depositá hopi sèn riba kuenta di FDRS, nos frakshon tin gana di sa kiko e depósitonan aki ta enserá i kua ta e relashon entre FDRS i MDPT.

Presensia di minister Presidente (responsabel pa fondonan di RDK) i minister enkargá ku finansa ta nesesario na e reunion aki pa asina miembronan di parlamento por debatí ku e ministernan riba e tópiko aki i nos ta pidi presidente di parlamento pa ekstendé un invitashon na e ministernan konserní.

Atentamente,

oproep-openbaar-pagonan-na-fdrs

This site uses Akismet to reduce spam. Learn how your comment data is processed.

error: Content is protected !!
%d bloggers like this: