Diskurso di presidente di UNSEBAKO mr Juny Sluis na okashon di lansamentu i boutismo di e buki “Ta den bario ta lanta e mucha” dia 1 di désèmber 2016 na sentro di bario Souax.

Diskurso di presidente di UNSEBAKO mr Juny Sluis na okashon di lansamentu i boutismo di e buki “Ta den bario ta lanta e mucha” dia 1 di désèmber 2016 na sentro di bario Souax.

Distinguido presentenan, di mi parti tambe bontardi i bon biní.
Fundashon Union di Sentronan di Bario di Kòrsou, UNSEBAKO, for di su lantamentu 2 aña i mei pasá a hiba di pensamentu ku bario ta un di e nukleonan importante ku por ehersé gran influensia riba edukashon i formashon di un mucha. Asina ku e mucha kuminsá krese i e sali for di su kurá di kas, ela drenta bario. For di e momentu ei i pa hopi tempu despues e lo ta tur dia den su bario i komo tal vulnerabel pa tur influensia di su bario. Ta na nos, habitantenan adulto di e bario, pa pèrkurá pa e influensia di bario riba e mucha ta bon influensia.
E título di e buki ku nos ta bai batisá i lansa awe ta “Ta den bario ta lanta e mucha”. Un tradukshon liber di e dicho afrikano ku ta bisa: “It takes a village to raise a child”. Aki ratu boso lo tuma nota ku e buki lo keda batisá tambe konforme tradishon afrikano ku tera fertil di Bon Pais.(Pa esnan ku no sa, prome ku Souax a kuminsá desaroyá komo bario durante e prome dekadánan di siglo 20, su nòmber no tabata Souax, sino Plantashi Bon Pais)
Komo ku nos ta yegando final di aña, lo mi ke repasá ku bosonan e aktividatnan prinsipal ku UNSEBAKO a desplegá den transkurso di e aña ku ta kabando aki.
E organo máksimo di UNSEBAKO, pues e Konseho di Federashon, en total a reuní 6 biaha. Durante e reunionnan aki sentronan di bario afiliá a interkambiá di pensamentu riba diferente tópiko relevante pa funshonamentu di sentronan di bario i a tuma desishon riba kiko lo mester bira e maneho di direktiva i a fiha posishon tambe pa loke ta e relashon entre UNSEBAKO i gobièrnu.
Igualmente mi por menshoná ku na 4 okashon direktivanan di sentronan di bario afiliá na UNSEBAKO a reuní pa interkambiá konosementu i eksperensia; Durante e enkuentronan aki diferente tópiko importante pa loke ta maneho di un sentro di bario a keda tratá.
Durante aña 2016 na 46 okashon UNSEBAKO tabata presente den e programa “Bario pa Bario, t’esei ta Kòrsou” ku ta keda transmití tur djadumingu di 2or pa 4or na Radio Hoyer 1. Na 15 okashon e programa kompletu tabata na enkargo di UNSEBAKO.
Mi por menshoná tambe ku den e prome kuartal di e aña aki 2 sentro di bario mas a afiliá na UNSEBAKO. Ta trata di sentro di bario Westpunt i sentro di bario Koraal Specht.
Durante temporada di kuaresma fundashon UNSEBAKO den koperashon ku fundashon ”Piskadó nos ta” a logra pasa e pelíkula “Marcelino Pan y Vino” na tur sentro di bario afiliá na UNSEBAKO.
Por lo demas mi por partisipá ku direktiva di UNSEBAKO a reuní durante aña ku diferente instansia di gobiernu i organisashonnan privá i a duna asistensia na diferente sentro di bario afiliá den algun kaso spesifiko, mientras ku pa selebrá di e di dos aniversario di UNSEBAKO a organisá un simposio sumamente interesante i eksitoso.
Dama i kabayeronan, UNSEBAKO su meta ta pa fortifiká, stimulá i (re)aktivá sentronan di bario na Kòrsou pero tambe pa sostené aktividatnan edukativo den koperashon ku sentronan di bario i konsekuentemente promové e sentido di konvivensia (e espírito komunitario) bou di e habitantenan di bario i desde luego bou di e siudadanía di Kòrsou. Pa por logra e meta ei mas pronto posibel, UNSEBAKO a presentá un organisashon sólido. Un fundashon ku karakter federativo ku su komishonnan fiho ku ta prepará e maneho, su konseho di federashon ku ta fiha e maneho, un direktiva kapas i fuerte pa ehekutá e maneho i su grupo di konsehero altamente kompetente (e asina yamá: tim di sosten) konsistiendo di 11 profeshonal: 1 ingeniero, 1 médiko, 1 ofisial di polis, 2 hurista, 1 eksperto di seguro, 1 trahadó sosial, 1 guia di hubentut, 1 historiadó, 1 sosiólogo i 1 accountant.
Ku e grupo di boluntarionan ekselente aki, hendenan kapas i determiná pa duna un man pa yuda desaroyá barionan pa asina logra adelanto di Kòrsou, UNSEBAKO a profilá ultimo 2 aña i mei di un forma asertá i efektivo, i por bisa ku ya kaba a kuminsá kosechá resultado positivo den sentido ku diferente sentro di bario ta funshoná mihó kompará ku 2 aña i mei pasá. Esaki indudablemente lo trese ku ne ku riba término barionan tambe lo funshoná mihó komo tal.
Sinembargo, ta mas ku opvio ku sentronan di bario lo no por funshoná eksitosamente sin sosten adekua di gobièrnu. Sosten adekuá ta kuminsá ku organisashon adekuá; Organisashon serio, dirigí pa logra e meta stipulá. Nos tur por a tuma nota den prensa lokal di e desenlase dramatiko ku fundashon Sefba últimamente a resultá aden.
E fundashon ku gobièrnu a lanta pa Stimulá Edukashon i Formashon den BArio a resultá un desapunto total pa sentronan di bario. Sefba a resultá inkapas pa duna e sosten nesesario. Sefba a resultá un desepshon pa gobièrnu mes tambe komo ku resientemente por a skucha e minister di Asuntunan Sosial i di Labor ku ta esun polítikamente responsabel pa Sefba, deklará públikamente ku Sefba no ta kumpli ku e meta ku ela keda lantá pe. Sefba probablemente a resultá un desepshon pa Sefba mes si konsiderá tur e frikshonnan i peleanan interno ku konstantemente ta tuma lugá dentro di e organisashon.
UNSEBAKO ta keda pendiente di e akshonnan ku gobièrnu lo bai tuma pa koregí e situashon lamentabel i penoso ku sentronan di bario a pasa aden durante ultimo 5 aña, unabes ku e minister responsabel mes a rekonosé ku durante e añanan ku a pasa, e no a logra pone Sefba kumpli ku e meta i tareanan ku ela keda lantá pe.
Distinguido oudiensia, aki ratu despues di boutismo di e buki, lo mi entregá e promé ehemplar na parlamentario Hensley Koeiman. Esei, komo ku UNSEBAKO i sentronan di bario afiliá tambe a tuma nota den prensa lokal di deklarashonnan di Sr. Koeiman den sentido ku e proksimo gobièrnu lo tin un kara sosial. Ademas nos sa tambe ku Sr. Koeiman ta bon na altura di esfuersonan grandi ku sentronan di bario ta hasi pa kumpli ku nan meta den nan bario. Sr. Koeiman, den su trabou komo parlamentario, di un forma genuino, semper a mustra interes pa e tema “bario”. Nos ta konta ku den kualke otro funshon ku Sr. Koeiman lo por okupá den futuro, e lo sa di duna sosten na bon funshonamentu di nos sentronan di bario i nos barionan.

Finalmente, pèrmití mi for di e lugá aki pa na nòmber di UNSEBAKO duna rekonosimentu i un palabra di gratitut na e 3 koleganan ku a join mi den e proyekto importante aki, den kua nos a analisá echosnan i a skirbi nos pensamentunan respekto e tema “ta den bario ta lanta e mucha”, kual produkshon awor lo keda na disposishon di generashonnan ku ta bini.
Tahirah, Frank, Max, na nòmber di fundashon Union Sentronan di Bario di Kòrsou, masha danki pa boso aporte. Bon trabou! Igualmente mi ta gradisí boso tambe pa a hasi posibel ku sentronan di bario i diferente otro organisashonnan sosial por risibí un ehemplar di e buki aki gratuitamente.
Distinguido oudiensia, danki pa boso atenshon.

_vos8848

_vos8850

_vos8895

_vos8910

_vos8912

_vos8914

_vos8927

_vos8931-1

_vos8952

_vos8970

_vos8973

_vos8991

_vos9010

_vos9025

_vos9034-1

_vos9036

_vos9043

_vos9045

_vos9051

_vos9053

_vos9054

_vos9056

_vos8973-copy

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: