GREENTOWN TA BOGA PA MAS INFORMASHON TOKANTE PROSESO DI REFINERIA

GREENTOWN TA BOGA PA MAS INFORMASHON TOKANTE PROSESO DI REFINERIA

Greentown semper a insistí pa na un manera transparente kuida nos interesnan ekonómiko relashoná ku e refineria. Esaki pa motibu ku GreenTown tabata premirá ku manera kosnan tabata bai nos por yega na 2019 sin un alternativa drechi ora e kontrato ku PDVSA terminá.
Nos a bai asina leu di presentá un alternativa si kontinuashon di e refineria lo no ta posibel. I nos a trese dilanti ku si ta kontinuá ku e refineria mes e mester ta limpi, mester limpia e polushon eksistente tantu na tera komo den awa i tambe e kondishonnan mester ta di tal manera ku Kòrsou lo saka mas probecho ekonómiko, na un manera duradero ku ta sostené i fortifiká nos outonomia.
Nos por bisa ku nos a haña rason tambe, mirando kon e proseso ku PDVSA a kana, te ku gobièrnu a disidí di bai un otro ruta. Algu ku nos tabata konsiderá pa basta tempu un riesgo grandi pa vários motibu.
Nos a tuma nota tambe ku a firma un akuerdo kategorisá komo “ Heads of Agreement” ku e kompanianan for di China, Guangdong Zhenrong Energy Co. Ltd (GZE) i China Zhenrong Holding Limited (CZR) pa un periodo di 40 aña. Manera e informashon ta yega serka nos ta trata di un akuerdo pa ópera e Refineria i e terminal di zeta na Bullenbaai (COT). Tambe nos ta komprondé ku lo e bai tin un ròl grandi den nos kolumna di energia lokal tambe.
E manera ku e proseso a i ta kanando kada bes ta laga suidadanonan, gruponan i miembronan den Parlamentu sorprendí ku e akshonnan ku gobièrnu ta tuma. Esaki no ta na nodi si gobièrnu ta hasiendo algu bon pa Kòrsou. Ya pa basta tempu kaba GreenTown ta pidi pa transparensia riba desishon di futuro di refineria na Kòrsou, tambe pa motibu di e posishon ekonómiko hopi malu di e aktual eksplotadó, PDVSA, ku ya pa hopi aña kaba GreenTown a premirá.
E manera ku ta atendé e akuerdo aki, kaminda Parlamento i komunidat ta haña informashon despues ku a firma, no ta digno di un demokrasia.
No ta solamente mas sèn i mas aktividat komersial ta hasi un pueblo felis pero rèspèt i partisipashon demokrátiko ta esensial pa un desaroyo adekuá. Di otro un banda por tin desaroyo komersial i un pueblo ku no ta sinti su mes respetá.
E desaroyo rondó di refineria semper tabata i lo tin un impakto grandi riba nos komunidat. Esaki a sosodé den tempu kolonial ku yegada di Shell kaminda nos no tabatin muchu di bisa. Awor aki esaki tambe por tin un impakto positivo grandi pa nos. Nos no ta pretendé lo kontrario komo ku no tin informashon pa husga. Lokual si nos ta lamentá ku awe ku nos no ta un kolonia mas, tampoko nos ta haña informashon pa sa kiko ta bai pasa, pa bisa ku nos ta di akuerdo òf ku nos por duna un man pa kos bai mihó.
Por ehèmpel, pa grandi ku e kresementu ekonómiko tabata ku yegada di refineria na Kòrsou, nos ta sigur ku si ta nos mes lo a disidí e tempu aya, nos lo no a desperdisiá e área di Schotttegat di e forma ku el a tuma lugá. I tristu di mira ku e trato aki ta bin di nos mes hendenan ku ta trata nos asina.
Pues nos ta pidi atenshon pa dos proseso.
1. trato desente i respetuoso pa komunidat.
2. informashon adekuá tokante e proseso i e plannan pa por husga pa nos mes.
Promé ku e akuerdo i e informashon ku lo no sigui ku PDVSA i ku a sali ku Guangdong Zhenrong Energy Co. Ltd den publisidat nos a pidi Parlamento pa trese klaridat tokante e proseso ku tabata hiba. Nos tabata di e pensamentu ku no por negoshá si no ta dispuesto na tuma desishon drástiko. Pues gobièrnu por haña mas sosten, simplemente informando mihó ku diálogo i partisipashon di komunidat basá riba informashon adekuá. Asina no solamente logra aktividat komersial pero tambe un desaroyo sosial adekuá ku sumamente importante.
E impakto i influensia lo ta grandi. Nos ta spera ku nos gobièrnu i nos Parlamento lo respetá nos pueblo i informá. Un demokrasia ku no ta partisipativo no ta demokrasia.
E proyekto ta parse di ta asina impaktante ku e meresé un aserkamentu integral pa nos por ta bon prepará i saka mayor probecho for di dje pa nos pais.
No laga nos hasi e mes un erornan ku a tuma lugá den e era kolonial.
Direktiva di GreenTown, 2016