SELIKOR AWOR KU POSIBILIDAT PA SPAR I TROKA FUN MILES

selikor

SELIKOR AWOR KU POSIBILIDAT PA SPAR I TROKA FUN MILES

Den su afan pa sigui stimulá komunidat pa deshasí di shushi di un forma responsabel, krea mas konsientisashon den komunidat pa ku e aspekto di limpiesa i duna insentivo na su klientela Selikor ta amplia su programa di Fun Miles. E ampliashon ta enserá ku no únikamente klientenan por spar Fun Miles na Selikor sino lo por paga tambe ku Fun Miles pa e diferente produkto i servisionan di Selikor.

Insentivo pa hiba shushi lèntfel i hasi uso di Selikor su servisionan
Pa ofresé e insentivo di Fun Miles na un grupo mas amplio di kliente entrante luna di febrüari 2017 lo bai apliká e sistema di spar punto akí pa tur esnan ku hasi nan pago na e punto di pago na lèntfel Malpais mesora despues ku kaba di tira shushi afó. Dependiendo di e montante di e pago e kliente lo risibí un kantidat di Fun Miles serka Selikor. E sistema nobo di otorgá Fun Miles akí ta komparabel ku e sistema ya eksistente serka otro partnernan di Fun Miles, esta pa kada pago di 2,50 e kliente lo risibí 1 Fun Miles.

Pa loke ta trata e otro servisionan di Selikor tambe lo bai duna Fun Miles segun e mesun sistema di punto deskribí akí i konforme un skema ku lo bai publiká mensualmente. Den e skema lo indiká kua servisio/produkto e luna en kuestion lo otorgá Fun Miles ariba.

Paga pa servisio i produktonan di Selikor ku Fun Miles
Pa kumpli ku diferente petishon ku Selikor a bin ta risibí, entrante febrüari 2017 ta bira posibel tambe pa klientenan paga ku nan karchi di Fun Miles pa tur e diferente produkto i servisionan di Selikor. Selikor pues no solamente ta bai otorgá Fun Miles komo insentivo pero awor ta bai aseptá Fun Miles tambe komo forma di pago. En espesial pa klientenan ku ta hasi uso di lèntfel riba un base regular komersial esaki tin benefisio grandi.

Separá shushi i gana premio na Kaya di Medioambiente
Manera ta konosí te ku resientemente Selikor tabata duna e insentivo di Fun Miles na Kaya di Medioambiente ora klientenan trese nan shushi ku ta resiklabel di forma separá. Debí na asina tantu sugerensha i petishon di nos klientenan lo bai trese un kambio den e sistema akí. Pa loke ta trata entrega di shushi na Kaya di Medioambiente entrante promé di yanüari 2017 lo kambia e sistema di spar Fun Miles pa un rifa mensual. Tur kliente ku bai depositá shushi na Kaya di Medioambiente lo risibí un lòt pa partisipá na un rifa mensual pa gana premionan hopi lukrativo. Den e sistema di rifa akí lo eliminá e kantidat mínimo di shushi ku Selikor tabata eksigí pa trese na e Kaya di Medioambiente. Ta nifiká ku pa kualkier kantidat e kliente lo risibí un lòt.

Ku tur e insentivonan akí Selikor ta sigui traha pa fortalesé e laso ku su klientela i konsientisá komunidat riba e hecho ku un pais limpi ta konhuntamente mester traha riba esaki. Selikor mester hasi su parti i kada habitante tambe mester hasi nan parti. Like nos page riba facebook i keda na altura di tur nos proyektonan pendiente. Pa mas informashon por yama nos na 434-1300.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: